Dólar de prata do 400 aniversario de Jamestown
| Dólar de prata do 400 aniversario de Jamestown | |
|---|---|
 |
 |
| A/: Imaxes dunha persoa africana e dun indio americano, con John Smith no medio. Marcas de gravador (DW e DE).
Lendas: LIBERTY / IN GOD WE TRUST / FOUNDING JAMESTOWN / 1607-2007 |
R/: Tres barcos navegando. Marca de ceca (P) e marcas de gravador (SG e CLV).
Lenda: UNITED STATES OF AMERICA / ONE DOLLAR / E PLURIBUS UNUM |
O dólar de prata do 400 aniversario de Jamestown é unha moeda conmemorativa, non circulante, emitida pola Casa da Moeda dos Estados Unidos en 2007 e cuñada pola Ceca de Filadelfia.
Esta moeda dun dólar foi autorizada pola Lei 108-289, do 6 de agosto de 2004,[1] pola que se dispuxo a emisión dunha moeda conmemorativa do 400º aniversario do asentamento de Jamestown, no Estado de Virxinia.[2]
Esta moeda forma parte do programa de emisións da US Mint para conmemorar este asentamento, que se completa coa cuñaxe dunha moeda de ouro con valor facial de cinco dólares.[3]
Deseño[editar | editar a fonte]
Os deseños de ambas as moedas que compoñen o programa foron anunciados pola US Mint en xuño de 2006.[4]
No anverso da moeda, deseñado e gravado conxuntamente por Donna Weaver e Don Everhart, reprodúcense as figuras das coñecidas como "tres faces da diversidade": o capitán John Smith, unha persoa de orixe africana e un indíxena americano. Estas imaxes representan as tres culturas que confluíron en Jamestown. Xunto a estes motivos, inclúense lendas alusivas ao 400 aniversario do asentamento de Jamestown. A dobre data da moeda, 1607-2007, alude ao mesmo tempo a esa conmemoración e ao ano de emisión.[2][4][5]
Pola súa banda, o reverso, obra de Susan Gamble e Charles Vickers, representa os tres barcos nos que chegaron a Jamestown os seus 105 primeiros colonos británicos: o Susan Constant, o Godspeed e o Discovery.[4][5]
Produción e comercialización[editar | editar a fonte]
A lei que autorizou a emisión destas moedas conmemorativas prevía unha tiraxe máxina de 500.000 de exemplares.[1][2] A moeda comezou a produciuse na Casa da Moeda de Filadelfia o 1 de xaneiro de 2007,[3] e estivo dispoñible para a súa adquisición por parte da poboación a partir do 10 de xaneiro de 2007.[6]
A súa produción foi de 79.801 moedas na súa condición estándar e 258.802 en versión con acabamento especial (proof), o que fai un total de 338.603 exemplares.[7]
A moeda comercializouse aos prezos de 35 dólares en condición estándar e 39 en versión proof,[5] e o beneficio conseguido coa súa venda destinouse conxuntamente á Secretaría do Interior dos EEUU e a dúas entidades sen ánimo de lucro: a Fundación Jamestown-Yorktown, de Virxinia, e a Asociación para a Preservación das Antigüidades de Virxinia.[2]
Recoñecementos[editar | editar a fonte]
O dólar de prata do 400 aniversario de Jamestown foi recoñecido co Premio Moeda do Ano de 2009, á moeda de maior relevancia histórica emitida no mundo en 2007.[8][9]
Notas[editar | editar a fonte]
- ↑ 1,0 1,1 "Public Law 108-289 - AUG. 6, 2004". Govinfo.gov
- ↑ 2,0 2,1 2,2 2,3 "Jamestown 400th Anniversary Commemorative Silver Dollar Coin". United States Mint.
- ↑ 3,0 3,1 "Jamestown 400th Anniversary Commemorative Coin Program". United States Mint.
- ↑ 4,0 4,1 4,2 "Jamestown 400th Anniversary Commemorative Designs Unveiled". United States Mint.
- ↑ 5,0 5,1 5,2 "1 Dollar Jamestown 400th Anniversary". Numista.com
- ↑ "Jamestown 400th Anniversary Commemorative Coins Available January 10". United States Mint.
- ↑ "Historical Commemorative Coin Sales Figures: 2007 Jamestown 400th Anniversary". United States Mint.
- ↑ "COTY goes to Mongolia". En Numismatic News. 11 de febreiro de 2009.
- ↑ Scarinci, D. (2015). Coin of the Year: Celebrating Three Decades of the Best in Coin Design and Craftsmanship. Krause Publications. ISBN 978-1-4402-4476-6
Véxase tamén[editar | editar a fonte]
Outros artigos[editar | editar a fonte]
Ligazóns externas[editar | editar a fonte]
- "2007 Jamestown Silver Dollar" (ModernCommemoratives.com)