Beniamino Stella
| Beniamino Stella | |
|---|---|
 | |
| Cardeal da Igrexa Católica | |
| Biografía | |
| Nacemento | 18 de agosto de 1941 en Pieve di Soligo |
| Ordes | |
| Ordenación sacerdotal | 19 de marzo de 1966, por Albino Luciani |
| Consagración episcopal | 5 de setembro de 1987, por Xoán Paulo II |
| Creado cardeal | 22 de febreiro de 2014, por Francisco |
| Prefecto de Congregación para o Clero | |
| 21 de setembro de 2013 - actualidade | |
| Predecesor | Mauro Piacenza |
| Outros | |
| Ficha en catholic-hierarchy.org | |
Beniamino Stella, nado en Pieve di Soligo o 18 de agosto de 1941, é un cardeal e arcebispo católico italiano, dende o 21 de setembro de 2013 prefecto da Congregación para o Clero.
Biografía[editar | editar a fonte]
Formación[editar | editar a fonte]
Naceu en Pieve di Soligo, na provincia de Treviso e na diocese de Vittorio Veneto o 18 de agosto de 1941. En 1960 trasladouse a Roma, onde estivo aloxado no Pontificio Seminario Maior Romano e estudou na Facultade de Teoloxía e Filosofía da Pontificia Universidade Lateranense.[1]
O 19 de marzo de 1966 foi ordenado sacerdote polo entón bispo de Vittorio Veneto Albino Luciani, futuro papa co nome de Xoán Paulo I. Despois de se formar en Dereito Canónico en Latrán, Luciani destinouno á Pontificia Academia Eclesiástica.
Carreira diplomática[editar | editar a fonte]
Comezou a carreira diplomática, e dende 1970 traballou nas nunciaturas en Santo Domingo, Zaire e Malta , e posteriormente foi promovido a pro-nuncio para a República Centroafricana e delegado apostólico no Chad.
O 21 de agosto de 1987 foi nomeado arcebispo titular de Midila, e consagrado na Basílica de San Pedro polo papa Xoán Paulo II, sendo os co-consagrantes Eduardo Martínez Somalo e Jean Pierre Marie Orchampt.
O seguinte 7 de novembro foi nomeado pro-nuncio apostólico para a República Democrática do Congo, e posteriormente foi tranferido ás nunciaturas de Cuba (en 1992) e Colombia (1999).
Curia Romana[editar | editar a fonte]
O 13 de outubro de 2007 foi nomeado presidente da Pontificia Academia Eclesiástica, a institución que adestra aos diplomáticos para a Santa Sé.
O 21 de setembro de 2013 foi nomeado prefecto da Congregación para o Clero.
O 12 de xaneiro de 2014 o papa Francisco anunciou a súa creación como cardeal no consistorio do 22 de febreiro seguinte.
Notas e referencias[editar | editar a fonte]
- ↑ vaticaninsider.lastampa.it, ed. (23 de setembro de 2013). "Tocca a Beniamino "Corazón"". Arquivado dende o orixinal o 27 de setembro de 2013. Consultado o 25 de febreiro de 2014.
| Control de autoridades |
|
|---|
