Anton Webern

Anton Webern
Anton Webern en Szczecin en outubro de 1912.
Nacemento	3 de decembro de 1883
	Viena Imperio Austrohúngaro
Falecemento	15 de decembro de 1945 (61 anos)
	Mittersill Austria
Soterrado	Mittersill
Nacionalidade	Austria
Educado en	Universidade de Viena
Na rede
http://www.antonwebern.com
[ editar datos en Wikidata ]

Anton Webern, nado en Viena o 3 de decembro de 1883 e finado en Mittersill o 15 de setembro de 1945, foi un compositor austríaco pertencente á chamada Segunda Escola de Viena, da que foi un dos máximos expoñentes xunto con Schönberg e Alban Berg, cos que conformou a chamada Trindade Vienesa. Como alumno e seguidor de Schönberg, Webern é un dos máximos expoñentes do dodecafonismo, ademais, as súas innovacións no que se refire á organización da altura, o ritmo e a dinámica foron decisivos no desenvolvemento do serialismo integral.

Traxectoria

Foi bautizado co nome de Anton Friedrich Wilhelm von Webern. Nunca usou os seus nomes intermedios, deixando o "von" en 1918. Despois de pasar boa parte da súa mocidade en Graz e Klagenfurt, Webern ingresou na Universidade de Viena en 1902. Estudou musicoloxía con Guido Adler, e presentou unha tese sobre os Choralis Constantinus do compositor renacentista Heinrich Isaac. Este interese pola música antiga influiría moito na súa técnica compositiva anos máis tarde.

A Segunda Escola de Viena

Estudou composición con Arnold Schoenberg, e ao graduarse escribiu a súa Passacaglia, Op. 1 en 1908. Coñeceu a Alban Berg, quen tamén era alumno de Schoenberg, e estas dúas amizades serían as máis importantes da súa vida ao marcar decisivamente o seu camiño musical. Despois de finalizados os seus estudos, tomou postos de dirección musical nos teatros de Ischl, Teplitz, Danzig, Stettin e Praga antes de regresar a Viena. Alí axudou a sacar adiante a Sociedade para Execucións Musicais Privadas que dirixía Schoenberg e dirixiu a Orquestra Sinfónica de Traballadores de Viena dende 1922 ata 1934.

Durante o nazismo

A música de Webern foi denunciada como "bolxevismo cultural" cando o Partido Nazi triunfou en Austria en 1938. Polo tanto, tivo dificultades para traballar, e tomou un posto como editor e corretor para a editorial que publicaba a súa música, Universal Edition. Webern deixou Viena en 1945 e marchou a Mittersill, en Salzburgo, pensando estar máis seguro alí. Porén, o 15 de setembro, durante a ocupación aliada de Austria, foi ferido mortalmente polo disparo dun soldado estadounidense ebrio despois de arrestar ao seu xenro por actividades de contrabando.