Madonna de Kíiv
A Madonna de Kíiv é unha fotografía dunha muller aleitando a un bebé no Metro de Kíiv, onde se refuxiaran durante un bombardeo das Forzas Armadas da Federación Rusa en 2022 sobre a capital de Ucraína.
A foto foi tirada polo xornalista András Földes e fíxose popular en Internet, converténdose nun emblema da crise humanitaria e da inxustiza da guerra. A imaxe inspirou unha icona mostrada nunha igrexa católica de Mugnano di Napoli (Italia), sendo un símbolo da resistencia e a esperanza.[1]
Historia[editar | editar a fonte]
Nos primeiros días da invasión rusa de Ucraína, moitos cidadáns acubilláronse nos pasos subterráneos do Metro de Kíiv durante os bombardeos rusos. Alí, Tetyana Blizniak de 27 anos dáballe o peito á súa filla Marichka de tres meses; a escena chamou a atención do xornalista húngaro András Földes quen decidiu retratala. A muller, canda a súa filla e o seu marido, buscara refuxio no metro o 25 de febreiro de 2022, e, aínda que debían ser evacuados o día 26, non puideron facelo debido aos combates.[2]
A fotografía gañou moita notoriedade na rede e mesmo foi compartida pola páxina web do Vaticano o Día Internacional da Muller.[3] A artista ucraína Marina Solomennykova, de Dnipro, atopou nela a inspiración para facer un cadro de María aleitando ao Neno. Nel, a capucha do suadoiro da nai é representado como o veo da virxe María, e detrás da súa cabeza, un plano do metro de Kíiv faille de auréola.[4]
Por petición do sacerdote xesuíta Vyacheslav Okun, unha copia en tea da obra "Madonna desde o Metro" foi enviada a Italia onde serviría o cura.[1] O día de Xoves Santo, o Arcebispo de Nápoles consagrou a pintura como un obxecto de adoración.[2] A icona é conservada na Igrexa do Sagrado Corazón de Xesús, co título de "Madonna de Kíiv", en Mugnano di Napoli. A obra foi consagrada polo papa Francisco o 25 de marzo de 2022.[5]
Tetyana Blizniak máis tarde tivo refuxio en Lviv.[6]
Significación[editar | editar a fonte]
A imaxe deveu tanto unha ilustración da crise humanitaria e da inxustiza da guerra,[6] e un símbolo da esperanza e resistencia silenciosa dos ucraínos.[1] Se ben, a virxe María co seu fillo Xesús, foron perseguidos por Herodes, a María actual ampara ao seu fillo da violencia da guerra.[7] Pola súa temática e interpretación, a Madonna de Kíiv garda paralelismos coa Virxe de Kíiv, unha icona ortodoxa do século XII que foi símbolo da identidade nacional ucraína e de resistencia durante a época soviética. Hoxe, a Virxe de Kíiv, é considerada un tesouro cultural e un símbolo de patrimonio e identidade ucraína.[8][9]
Notas[editar | editar a fonte]
- ↑ 1,0 1,1 1,2 Toma, Mihai (2022-04-30). "„Madona din Kiev”. Poza cu o ucraineancă alăptându-și copilul într-un adăpost de la metrou, ajunsă icoană într-o biserică din Italia". Libertatea (en romanés). Consultado o 2023-03-18.
- ↑ 2,0 2,1 "Madona del Metro la Napoli". Puterea.ro (en romanés). 2022-04-25. Consultado o 2023-03-18.
- ↑ "Francisco: Herir a una mujer es ultrajar a Dios - Vatican News". www.vaticannews.va (en castelán). 2022-03-08. Consultado o 2023-03-18.
- ↑ "Ukrainian mother breastfeeding during war becomes Marian icon". Aleteia — Catholic Spirituality, Lifestyle, World News, and Culture (en inglés). 2022-03-28. Consultado o 2023-03-18.
- ↑ ""Madonna of Kyiv" icon depicted in one of the churches of Naples - RISU". Religious Information Service of Ukraine (en inglés). Consultado o 2023-03-18.
- ↑ 6,0 6,1 Pietrarosa, Emma (2022-04-24). "Madonna di Kiev: la donna ucraina che allatta diventa un simbolo di culto". Roba da Donne - News (en italiano). Consultado o 2023-03-18.
- ↑ "With Madonna in Kyiv". AGNI Online (en inglés). 2022-03-02. Consultado o 2023-03-18.
- ↑ Alla Nedashkivska, Art and Culture of Ukraine: Contemporary Scholarship, (CIUS Press, 2012)
- ↑ Orest Subtelny, Ukraine: A History, (University of Toronto Press, 2009)