Tetracerus quadricornis

Na Galipedia, a Wikipedia en galego.

Tetracerus quadricornis
Antílope de catro cornos

Macho

Femia
Femia

Estado de conservación
Vulnerable
Vulnerable[1]
Clasificación científica
Reino: Animalia
Filo: Chordata
Subfilo: Vertebrata
Clase: Mammalia
Orde: Artiodactyla
Suborde: Ruminantia
Familia: Bovidae
Subfamilia: Bovinae
Tribo: Boselaphini
Xénero: Tetracerus
Leach, 1825
Especie: T. quadricornis
Nome binomial
Tetracerus quadricornis
Blainville, 1816
Especie tipo
Cerophorus quadricornis
Blainville, 1816
Distribución de Tetracerus quadricornis
Distribución de Tetracerus quadricornis

Distribución de Tetracerus quadricornis

Tetracerus quadricornis é unha especie de mamífero artiodáctilo ruminante da familia dos bóvidos, subfamilia dos bovinos,[2] e tribo dos boselafinos, coñecido na bibliografía como antílope de catro cornos.

É o único membro do xénero Tetracerus e o único bóvido de catro cornos. Distribúese amplamente, pero en poboacións descontinuas, na maior parte da India, desde os contrafortes do Himalaia; algúns individuos poden vivir no Nepal.[3]

Características[editar | editar a fonte]

Tetracerus quadricornis mide de 80 a 110 cm de lonxitude de cabeza e tronco, máis unha cola de 10 a 15 cm; a súa altura na cruz é de 55 a 65 cm, e pesa entre 15 e 25 kg.

O pelo é curto e delgado, de coloración xeral parda; a parte interior das patas e a zona ventral son de cor branca. Os machos son de cor parda avermellada polas partes superiores, e teñen unha banda escura que se estende cara a abaixo na parte frontal de cada pata; os máis vellos son de cor amareleada. As femias xeralmente son de cor algo máis agrisada.

Só os machos teñen cornos: un par de pequenos cornos rectos en forma de puga detrás dos ollos e un segundo par de cornos máis pequenos enriba deles.[4] O par posterior mide de 80 a 100 mm de lonxitude, e o frontal de 25 a 38 mm.

Bioloxía[editar | editar a fonte]

O hábitat e a ecoloxía da especie non son ben coñecidos. Encóntranse en outeiros ben arborados ou en zonas montañosas, e nunca lonxe da auga.[3]

Comportamento[editar | editar a fonte]

É unha especie solitaria,[3] e rara vez se encontran máis de dous exemplares xuntos. Estes animais son sedentarios e viven na mesma rexión durante toda a súa vida. Poden ser facilmente domesticados cando son novos, pero resultan extremadamente delicados en cativerio.

Alimentación[editar | editar a fonte]

Aliméntanse de ramas de árbores e arbustos, froitos e herbas.[3]

Reprodución[editar | editar a fonte]

O machos poden seren extremadamente agresivos entre si durante o período de celo. O apareamento ten lugar durante a temporada de chuvias, de xullo a setembro. Polo xeral nacen unha ou dúas crías por parto, cun peso medio de ao redor de 1 kg cada unha.

Lonxevidade[editar | editar a fonte]

o antílope de catro cornos pode vivir en catividade até os 10 anos de idade.

Depredadores[editar | editar a fonte]

A especie é cazada por cuóns, tigres, gatos pequenos, lobos e leopardos. Crese que o seu método defensivo é a atenta vixilancia e a súa velocidade.

Taxonomía[editar | editar a fonte]

Cabeza de macho de Tetracerus quadricornis.

O xénero Tetracerus foi fundado en 1825 polo zoólogo inglés William Elford Leach, e publicado en Trans. Linn. Soc. Lond., 14: 524.[5]

A súa única especie fora descrita por primeira vez en 1816 polo naturalista francés Henri Marie Ducrotay de Blainville, baixo o nome de Cerophorus quadricornis, na súa obra "Sur plusieurs espèces d'animaux mammifères, de l'ordre des ruminans", publicada no Bulletin des Sciences, par la Société Philomathique de Paris 8: 73-82.[6]

Máis tarde foi reclasificada no xénero Tetracerus, resultando así o redundante nome, en grego e en latín, que ten hoxe, Tetraceus quadricornis:

  • Tetracerus, do elemento grego τετρα- tetra-, "de catro", e κέρας kéras, "corno";
  • quadricornis, dos elementos latinos quadri- "de catro", e -cornis, de cornu, -us, "corno".

Poboación e status[editar | editar a fonte]

A poboación estimábase en 2001 en menos de 10.000 individuos maduros.[7] Debido á perda de hábitat de bosque, hai un continuo descenso da poboación, estimándose que ningunha subpoboación contén máis de 1.000 individuos maduros.

A principal amenaza para a especie é a destrución do seu hábitat debido á eliminación de matogueiras e bosques para conseguir terreos para a agricultura. Porén, a especie encóntrase en moitas áreas protexidas na India, e a especie está totalmente protexida pola lei de protección da vida silvestre. Está na lista do Apéndice III do CITES (só no Nepal).[8]

A situación da especie está clasificada pola UICN como de VU (especie vilnerábel).[8]

Notas[editar | editar a fonte]

  1. Mallon, D.P. "{{{taxon}}}". Lista Vermella de especies ameazadas. (en inglés). Unión Internacional para a Conservación da Natureza. 
  2. Tetracerus quadricornis en Wilson & Reeder (2005)
  3. 3,0 3,1 3,2 3,3 Rahmani, A. R. (2001): "India". En: D. P. Mallon & S. C. Kingswood (eds.), Antelopes. Part 4: North Africa, the Middle East, and Asia. Global Survey and Regional Action Plans, pp. 178-187. Gland, Suíza: UICN.
  4. Matthews, L. Harrison (1977): La Vida de los Mamíferos II. Barcelona: Ediciones Destino. ISBN 84-233-0700-X, p. 706.
  5. Tetracerus en Wilson & Reeder (2005).
  6. quadricornis Blainville, 1816 described in Cerophorus en AnimalBase. SUB Göttingen.
  7. Mallon, D. P. & S. C. Kingswood, eds. (2001): Antelopes. Part 4: North Africa, the Middle East, and Asia. Global Survey and Rgeional Action Plans, pp. 178-187. Gland, Suíza: UICN.
  8. 8,0 8,1 Mallon, D. P. (2008): Tetracerus quadricornis Arquivado 15 de outubro de 2014 en Wayback Machine. na Lista vermella de especies ameazadas da UICN. Versión 2014.2.

Véxase tamén[editar | editar a fonte]

Bibliografía[editar | editar a fonte]

Outros artigos[editar | editar a fonte]

Ligazóns externas[editar | editar a fonte]