Rosendo Sar
| Biografía | |
|---|---|
| Nacemento | 1908  Almeiras, España |
| Morte | 5 de maio de 1986 (77/78 anos) Almeiras, España |
| Actividade | |
| Ocupación | membro da resistencia |
| Carreira militar | |
| Conflito | guerra civil española |
Rosendo Sar Lantes, nado en Almeiras (Culleredo) cara a 1908 e finado na mesma parroquia o 5 de maio de 1986, foi un guerrilleiro antifranquista galego.
Traxectoria
[editar | editar a fonte]Fillo de Rosendo Sar Lantes, presidente da Sección de Unión Mutualista Campesina de Almeiras, e Silvestra Lantes Pan. Foi mobilizado en agosto de 1936 no Rexemento de Artillaría Lixeira número 15, ata xuño de 1939. Incorporouse á guerrilla o 7 de maio de 1948, ao destacamento Manuel Bello, xunto a José María Castelo Mosquera, José Antonio Cortiñas Blas e Manuel Pena Camino. Participou no golpe económico a un veciño de Bergondo e no incendio do concello de Abegondo. Comunicoulle a Jesús Valeiro Gómez, que exercía de xefe, a súa intención de volver á casa, negándose este e amenazándoo José María Castelo. Presenciou a execución de José Seijo Don. A finais de 1948 aparece formando parte do grupo capitaneado por Adolfo Allegue Allegue. Enfermo, un veciño de Mande de Bascoi, Manuel Sánchez, cunha manta que lle facilitaron, levouno a un monte para agochalo, e facilitoulle comida nos dous días que pensaba estar alí. Denunciado á Garda Civil, parece que foi avisado. Pasou algunhas tempadas agochado en covas, en Xabariz, Cabala (Cabanas) e na casa dun veciño de San Pedro de Nós. En maio de 1951 saíu con Benigno Andrade García "Foucellas" para formar a base da Regueira (Oza dos Ríos) onde permaneceron ata febreiro de 1952. Nese mes marchou con Manuel Vilar Arnoso e Foucellas para a zona de Curtis. Tras a caída dos seus dous compañeiros, entregouse en xullo de 1942. Xulgado en consello de guerra o 23 de xaneiro de 1953, foi condenado a 24 anos de reclusión. Finou en Almeiras aos 77 anos.[1]
Vida persoal
[editar | editar a fonte]Casou con Dolores Bermúdez Lamas e foi pai de Manuel Sar Bermúdez.
Notas
[editar | editar a fonte]- ↑ Necrolóxica en La Voz de Galicia, 6-5-1986, p. 61.
Véxase tamén
[editar | editar a fonte]Bibliografía
[editar | editar a fonte]- Martínez, Lupe (2023). Guerrilleir@s antifranquistas da provincia da Coruña. Vigo: Galaxia. pp. 456–457. ISBN 978-84-1176-172-7.
- Martínez, Lupe (2007). Coa man armada. "Ejercito Guerrillero de Galicia" -IV Agrupación- 1946 - 1948. Vigo: A Nosa Terra. pp. 127–128, 190. ISBN 978-84-8341-166-7.