Patela

Peixeira portando unha patela sobre a cabeza. Homenaxe á Muller Traballadora, na Pobra do Caramiñal.

Unha patela é unha cesta cadrada de bordo baixo feita con tiras de madeira. As peixeiras utilizaban este tipo de cestas para transportar e exhibi-lo peixe.

Fabricación

Elabórase coa técnica de tecido plano empregando tiras de madeira de castiñeiro. A boca remátase dobrando a urda e reforzándoa con dúas varas que van cosidas mediante unha tira en espiral. Leva dous buratos confeccionados a modo de asas.

A patela na cultura popular galega

A peixeira é unha das figuras máis representativas da cultura mariñeira de Galicia, aparece case sempre representada cunha patela sobre a cabeza, sendo o elemento que mellor as define. Hai diversas esculturas por todo Galicia onde podemos contemplar figuras de peixeiras portando patelas. De igual xeito, nas latas de conserva de Rianxeira e A Churrusquiña aparece representada unha peixeira cunha patela na cabeza.

Refraneiro

• Cesta patela, arrumba máis que leva.

Galería de imaxes

• 
  A Peixeira, en Xinzo (Ponteareas).
• 
  A Peixeira, en Vilanova de Arousa.
• 
  Do concello ás peixeiras, en Cangas.
• 
  Monumento á rianxeira, en Rianxo.
• 
  Monumento á peixeira, en Portonovo