Moeda de 50 francos Hércules
| Moeda de 50 francos Hércules [1] | |
|---|---|
 |
 |
| A/: Hércules espido, entre a Liberdade e a Igualdade. Sinatura do gravador (Dupré) no exergo.
Lendas: LIBERTÉ ÉGALITÉ FRATERNITÉ. |
R/: Valor facial e data no interior dunha grilanda de oliveira. Data
Lendas: REPUBLIQUE FRANÇAISE / 50 FRANCS |
| |
A moeda de 50 francos Hércules é a moeda de prata máis grande das emitidas en Francia baixo o sistema do franco francés, caracterizada pola figura de Hércules no seu anverso.
A moeda foi creada mediante o Decreto 74-797, do 23 de setembro de 1974, asinado polo presidente da República Francesa, Valéry Giscard D'Estaign.[2]
Tratábase dunha moeda de curso legal, aínda que a súa presenza na circulación foi practicamente nula, por mor do seu peso e o seu diámetro excesivos. Comezouse a emitir en 1974 e retirouse da circulación en 1980 debido ao crecemento dos prezos da prata, que provocou que o valor intrínseco do metal superase o seu valor facial.[3][4]
Deseño[editar | editar a fonte]
O seu deseño responde ao tipo Hércules, creado por Agustin Dupré inicialmente para a moeda de 5 francos da I República, cuñada por vez primeira en 1795,[5] e que foi retomado posteriromente para diversas moedas francesas.[6]
Anverso[editar | editar a fonte]
O anverso está caracterizado pola figura espida de Hércules, cunha pel de león ás súas costas, reconciliando a Liberdade coa Igualdade, que están en pé aos seus lados. A Liberdade está á súa dereita e sostén unha pica coroada por un barrete frixio, en tanto que a Igualdade está á súa esquerda, e sostén un perpendículo. O anverso complétase co lema LIBERTÉ ÉGALITÉ FRATERNITÉ na parte superior e a sinatura do deseñador no exergo.[1][6]
Reverso[editar | editar a fonte]
Pola súa banda, no reverso amósase o valor facial 50 FRANCS como motivo principal, no interior dunha coroa composta por pólas de oliveira, rodeada pola lenda RÉPUBLIQUE FRANÇAISE a ambos os lados e coa data no exergo.[1][6]
Canto[editar | editar a fonte]
O canto, creado polo Gravador Xeral de Moedas Raymond Joly, reproduce en relevo diversos motivos, separados por estrelas e rombos, de temática agropecuaria (acio de uvas, galo e mada de trigo), do comercio (caduceo, corno da abundancia e balanza) e da industria (compás, engrenaxe e martelo).[1][6]
Tiraxes[editar | editar a fonte]
Estas son as tiraxes anuais da moeda de 50 francos franceses tipo Hércules.[1] Ademais das cantidades da emisións ordinaria, que figuran na táboa, en 1974 cuñáronse a maiores 13.800 exemplares a modo de proba con deseño idéntico, aínda que no seu anverso se engadiu a palabra ESSAI baixo os pés da figura da Igualdade.[7]
| Ano de emisión | Exemplares cuñados |
|---|---|
| 1974 | 4.298.811 |
| 1975 | 4.552.011 |
| 1976 | 5.544.711 |
| 1977 | 7.884.011 |
| 1078 | 12.030.211 |
| 1979 | 12.040.511 |
| 1980 | 60.000 |
| Total | 38.526.255 |
Notas[editar | editar a fonte]
- ↑ 1,0 1,1 1,2 1,3 1,4 "50 Francs". Numista.com
- ↑ "Décret n°74-797 du 23 septembre 1974 autorisant la fabrication de pièces de 50 F en argent". Journal officiel de la République française. 25 de setembro de 1974. Páxina 9.858.
- ↑ "Décret n°80-148 du 15 février 1980 autorisant la démonétisation des pièces de 5 F en argent, de 10 F en argent et de 50 F en argent". Journal officiel de la République française. 19 de febreiro de 1980.
- ↑ "Les pièces de monnaie françaises de 10 et 50 francs Hercule". Sacra-moneta.com
- ↑ "5 Francs Union et Force". Numista.com
- ↑ 6,0 6,1 6,2 6,3 "Arrêté du 8 novembre 1974. Caracteristiques et type de la piece de 50 FRS". Journal Officiel de la République Française. 15 de novembro de 1974. Páxina 11.458.
- ↑ "50 Francs (Hercule - Essai)". Colnect.com
