João Duarte

João Duarte

Biografía
Nacemento	1952 (71/72 anos) Lisboa, Portugal
Datos persoais
País de nacionalidade	Portugal
Educación	Escola Superior de Belas-Artes de Lisboa (pt)
Actividade
Ocupación	numismático , escultor
Lingua	Lingua portuguesa
Premios (2011)  Premio Sanford Saltus de Medalla

João Duarte, nado en Lisboa en 1952, é un escultor e deseñador de moedas e medallas portugués.

Traxectoria

João Duarte ingresou en 1973 na Escola Superior de Belas Artes de Lisboa (posteriormente integrada na Universidade de Lisboa). En 1975 interrompeu os seus estudos para cumprir o servizo militar en Cabinda, Angola, onde tamén completou o Curso Geral dos Liceus. Ao seu regreso a Lisboa, en 1976 continuou coa súa formación e en 1978 acadou a súa licenciatura en Artes Plásticas, na especialidade de Escultura.

No curso 1978-1979 comezou a súa actividade docente en diversos niveis educativos, ata que en 1995 accedeu a un posto como profesor agregado na Facultade de Belas Artes da Universidade de Lisboa, onde ademais creou o Centro de Investigación e de Estudos Volte Face de Medalla Contemporánea.

O 31 de xaneiro de 2012 xubilouse da súa dedicación á universidade e o ano seguinte publicou un libro compilatorio da súa traxectoria, titulado João Duarte 30 Anos de Medalha e Moedas, e editado pola Imprensa Nacional-Casa da Moeda. Así mesmo, en 2018 foi o organizador dunha mostra sobre a súa actividade artística, titulada Escultor João Duarte - o ateliê. 40 anos de carreira, na galería do Movemento Arte Contemporánea, en Lisboa.

Entre outras entidades de carácter asociativo e académico, João Duarte é membro da Federación Internacional da Medalla de Arte (FIDEM) desde 1990. En 1998 foi elixido membro correspondente e en 2009 membro efectivo da Academia Nacional de Belas Artes de Lisboa, onde a partir de 2012 pasou a ocupar o cargo de secretario xeral.

Recoñecementos

• (2001): Medalla ao Mérito Cultural, Cámara Municipal do Seixal.
• (2011): Premio Sanford Saltus de Medalla, da American Numismatic Society.

Obra

Moeda de 200 escudos de 1995 conmemorativa do 50 aniversario das Nacións Unidas. O reverso é obra de João Duarte.

Como artista, a súa obra céntrase na escultura, tanto en pequenos formatos como grandes obras con carácter monumental, así como no deseño e o gravado de medallas artísticas e de moedas conmemorativas cuñadas pola Imprensa Nacional Casa da Moeda.

Duarte realizou dezenas de exposicións colectivas de escultura e medallística tanto en Portugal como noutros países, sinaladamente en España, os Estados Unidos, Alemaña, Xapón, Bélxica, os Países Baixos, Hungría, o Reino Unido, Finlandia e Suíza.

Como deseñador de moedas, cómpre salientar as moedas bimetálicas de 100 escudos dedicada á FAO (1995) e de 200 escudos comemorativa dos 50 anos da ONU (1995), así como diversas moedas conmemorativas, algunhas en ouro e en prata, co seu valor facial en euros.

• 
  Moeda de 100 escudos (1995) conmemorativa da FAO. Reverso: João Duarte.
• 
  Monumento de homenaxe ao Peirao da Jorna, en Vila Franca de Xira, obra de João Duarte.
• 
  Detalle do monumento anterior.