James Ross Snowden
 Retreto de James Ross Snowden Director da Casa da Moeda dos Estados Unidos (1853-1861) | |
| Biografía | |
|---|---|
| Nacemento | 9 de decembro de 1809 Chester, condado de Delaware.  Pensilvania. |
| Morte | 21 de marzo de 1878 (68 anos) Hulmeville, condado de Bucks. Pensilvania. |
| Lugar de sepultura | Cemiterio Laurel Hill. |
Member of the Pennsylvania House of Representatives (en)  | |
| Voceiro da Cámara de Representantes de Pensilvania | |
 | |
| Datos persoais | |
| País de nacionalidade |  Estadounidense |
| Educación | Dickinson College. |
| Actividade | |
| Lugar de traballo | Harrisburg |
| Ocupación | Político, tesoureiro dos EEUU e director da US Mint |
| Partido político | Partido Demócrata |
| Familia | |
| Pai | Nathaniel Randolph Snowden |
| Irmáns | Isaac Wayne Snowden |
| Descrito pola fonte | Appletons' Cyclopædia of American Biography, (sec:Snowden, James Ross) |
  | |
James Ross Snowden, nado en Chester, Pensilvania, o 9 de decembro de 1809, e finado en Hulmeville, no mesmo Estado, o 21 de marzo de 1878, foi un xurista e político estadounidense que ocupou o cargo de director da Casa da Moeda dos Estados Unidos (US Mint), de 1853 a 1861.
Traxectoria
[editar | editar a fonte]Primeiros anos e formación
[editar | editar a fonte]James Ross Snowden naceu en Chester, Pensilvania, o 9 de decembro de 1809, fillo de Sarah Gustine e do reverendo Nathaniel Randolph Snowden.[1][2] A familia descendía de John Snowden, quen en 1678 abandonara Nottinghamshire, en Inglaterra, para se asentar no que posteriormente sería a cidade de Filadelfia.[3]
Formouse no Dickinson College, onde o seu pai traballaba como conservador, e posteriormente estudou tamén Dereito nun despacho de Carlisle. Habilitouse para o exercicio da avogacía aos 19 anos.[1][2][3]
Participou tamén na milicia do Estado, na que foi coronel dun rexemento local.[1][2] En 1845 presidiu a convención militar do Estado en Harrisburg.[3]
Dereito e política
[editar | editar a fonte]En 1830 fixou a súa residencia en Franklin, no mesmo Estado de Pensilvania, e nesa cidade foi nomeado fiscal xeral adxunto. En 1838 resultou elixido representante na Cámara Lexislativa de Pensilvania, e actuou como voceiro no período 1842-1844.[1][2][3][4]
Tamén acadou o posto de tesoureiro do Estado de Pensilvania entre 1845 e 1847.[1][2]
Director da Casa da Moeda dos EEUU
[editar | editar a fonte]- Artigo principal: Director da Casa da Moeda dos Estados Unidos.
Entre 1847 e 1850, Snowden foi nomeado tesoureiro da Casa da Moeda dos Estados Unidos e ocupou tamén o cargo de axudante do secretario do Tesouro, en Filadelfia. En 1853, o presidente Franklin Pierce nomeouno director da Casa da Moeda, logo do falecemento de Thomas M. Pettit, posto do que dimitiu en maio de 1861.[1][2][3]
A partir dese ano foi nomeado protonotario do Tribunal Supremo de Pensilvania, cargo que exerceu durante 12 anos, ata 1873,[2] cando dimitiu do cargo para se dedicar integramente ao exercicio da avogacía.[3]
No seu período ao servizo da US Mint, Snowden desenvolveu o seu interese pola numismática e chegou a se converter nun reputado numismático do seu tempo. Contribuíu ao coñecemento nesta área coa publicación de diversos artigos e monografías, ademais da confección de sete informes anuais da actividade da Casa da Moeda.[1]
Vida persoal
[editar | editar a fonte]Snowden casou con Susan Engle Patterson o 13 de setembro de 1848 e xuntos tiveron dous fillos e tres fillas.[1][2][3]
O seu bisavó, Nathanael Fitz Randolph, foi un destacado participante na Guerra da Independencia.[1]
O seu sobriño, A. Loudon Snowden (1835-1912), foi embaixador en España e superintendente da Casa da Moeda de Filadelfia, unha das delegacións da US Mint.[1]
James Ross Snowden finou na súa casa de Hulmeville, no Estado de Filadelfia, o 21 de marzo de 1878.[1][2][3] O seu corpo foi soterrado no cemiterio Laurel Hill, de Filadelfia.[5]
Publicacións
[editar | editar a fonte]James Ross Snowden contribuíu con artigos sobre a moeda dos Estados Unidos e sobre outros aspectos da numismática no Bouvier's Law Dictionary e no National Almanac de 1873.[1] Ademais é autor de diversos traballos monográficos:[3][6]
Monografías
[editar | editar a fonte]- (1839). Report of the committee appointed to enquire into the causes of the disturbances at the seat of government, in December, 1838. Harrisburg, Filadelfia.
- (1857). A measure proposed to secure a safe treasury and a sound currency. Mifflin, Filadelfia.
- (1858). Instructions Relative to the Transaction of Business at the Mint of the United States and Its Branches. Mifflin, Filadelfia.
- (1859). The laws relating to the Mint of the United States and its branches. Mifflin, Filadelfia.
- (1860). A description of ancient and modern coins, in the Cabinet Collection at the Mint of the United States. Lippincott & Co., Filadelfia
- (1861). A description of the medals of Washington, of National and Miscellaneous Medals. Lippincott & Co., Filadelfia.
- (1864). The Coins of the Bible, and its Money Terms. Presbyterian Publications, Filadelfia.
- (1867). The Cornplanter Memorial. An historical sketch of Gy-ant-wa-chia - The Cornplanter, and of the six nations of Indians. Harrisburg, Filadelfia.
- (1870). International coinage. Lippincott's Magazine, Filadelfia.
Notas
[editar | editar a fonte]- ↑ 1,00 1,01 1,02 1,03 1,04 1,05 1,06 1,07 1,08 1,09 1,10 1,11 "Snowden, James Ross". En Wilson, J. G.; Fiske, J. (eds.) (1900). Páxinas 602-603.
- ↑ 2,0 2,1 2,2 2,3 2,4 2,5 2,6 2,7 2,8 "James Ross Snowden. Director of the Mint". En Failor, K. M.; Hayden, E. (1969). Medals of the United States Mint. US Government Printing Office. Páxinas 132-133.
- ↑ 3,0 3,1 3,2 3,3 3,4 3,5 3,6 3,7 3,8 "Snowden, James Ross". En Malone, D. (ed.) (1935).
- ↑ "House speaker Biographies: James Ross Snowden". Pennsylvania House of Representatives.
- ↑ "James Ross Snowden". Find a Grave.
- ↑ "Snowden, James Ross 1809-1878". WorldCat Identities.
Véxase tamén
[editar | editar a fonte]Bibliografía
[editar | editar a fonte]- Malone, D. (ed.) (1935). Dictionary of American Biography. Vol. 17. Charles Scribner's Sons, Nova York.
- Wilson, J. G.; Fiske, J. (eds.) (1900). Appletons' Cyclopædia of American Biography. Appleton, Nova York.
Outros artigos
[editar | editar a fonte]
| Predecesor: Thomas M. Pettit |
 Director da Casa da Moeda dos Estados Unidos 1853 - 1861 |
Sucesor: James Pollock |
