Doina Melinte

Cadro de medallas
Atletismo
Xogos Olímpicos
Campionato do Mundo de Atletismo
Campionato de Europa

Doina Melinte
	;
Biografía
Nacemento	27 de decembro de 1956 (67 anos); Hudești, Romanía (pt)
Membro da Cámara de Deputados de Romanía
Datos persoais
Altura	171 cm
Peso	59 kg
Actividade
Ocupación	mediofondista, atleta, política
Nacionalidade deportiva	Romanía
Deporte	atletismo
Disciplina deportiva	800 metros lisos ; corrida de meia-distância (pt)
Participou en
1992	Xogos Olímpicos de 1992
1988	Xogos Olímpicos de 1988
1984	Xogos Olímpicos de 1984
1980	Xogos Olímpicos de 1980

Doina Ofelia Melinte, nado en Hudesti o 27 de decembro de 1956, é unha atleta romanesa especialista en probas de media distancia que foi campioa olímpica de 800 metros e medalla de prata en 1500 metros nos Xogos dos Ánxeles 1984.

Traxectoria

O seu primeiro éxito internacional chegou en 1981, ao proclamarse campioa de 800 m e subcampioa de 1.500 m na Universíada de Bucarest. En 1982 gañou o ouro nos 800 m dos Campionatos de Europa Indoor de Milán. Ese ano liderou ademais a clasificación mundial dos 800 m con 1:55,05 feitos en Bucarest, que sería ademais a mellor marca da súa vida nesta proba. Con todo decepcionou na competición máis importante do ano, os Campionatos de Europa de Atenas, onde só foi 6ª.

O maior éxito da súa carreira deportiva conseguiuno nos Xogos dos Ánxeles 1984, onde gañou a medalla de ouro nos 800 m por diante da estadounidense Kim Gallagher e da tamén romanesa Fita Lovin, e tamén a medalla de prata nos 1.500 m, por detrás da italiana Gabriella Dorio.

Convén dicir que Melinte beneficiouse moito da ausencia a causa do boicot das soviéticas, que por esa época dominaban as clasificacións mundiais do mediofondo, con corredoras como Nadezhda Olizarenko, Irina Podyalovskaya ou Nadezhda Ralldugina.

Tras a súa vitoria olímpica, continuou sendo durante varios anos unha das mellores mediofondistas do mundo, dedicada sobre todo aos 1.500 metros, unha distancia na que foi dúas veces campioa do mundo en pista cuberta (1987 e 1989) e tres veces campioa de Europa (1985, 1988 e 1990). A isto súmase outro título europeo de 800 metros en 1989.

En canto ás súas actuacións ao aire libre, os seus maiores éxitos foron o bronce dos 1.500 metros nos Campionatos de Europa de Stuttgart 1986 e nos Campionatos do Mundo de Roma 1987. En cambio decepcionou nos Xogos Olímpicos de Seúl 1988, onde tras gañar a súa semifinal de 1.500 m, só puido acabar 9ª na final.

O 9 de febreiro de 1990 conseguiu en East Rutherford, Nova Jersey, unha nova marca mundial dos 1.500 metros en pista cuberta con 4:00,27 e tamén da milla na mesma carreira, con 4:17,14. Este último aínda continua vixente.

Retirouse do atletismo en 1992. Na actualidade, ocupa o 6º lugar na clasificación mundial de todos os tempos nos 800 metros con 1:55,05 que ademais segue sendo a marca nacional de Romanía.

Resultados

Ano	Competición	Lugar	Posto	Marca
1982	Campionato de Europa Indoor	Milán	1ª en 800 m	2:00,39
1982	Campionato de Europa	Atenas	6ª en 800 m	1:59,65
1983	Campionato de Europa Indoor	Budapest	4ª en 800 m	2:02,70
1983	Campionato do Mundo	Helsinqui	6ª en 800 m 6ª en 1.500 m	2:00,13 4:04,42
1984	Campionato de Europa Indoor	Gotemburgo	2ª en 800 m	1:59,81
1984	Xogos Olímpicos de 1984	Os Ánxeles	1ª en 800 m 2ª en 1.500 m	1:57,60 4:03,76
1985	Campionato de Europa Indoor	Pireo	1ª en 1.500 m	4:02,54
1985	Copa do Mundo	Canberra	3ª en 1.500 m	4:19,66
1986	Campionato de Europa	Stuttgart	3ª en 1.500 m	4:02,44
1987	Campionato do Mundo Indoor	Indianápolis	1ª en 1.500 m	4:05,68
1987	Campionato do Mundo	Roma	3ª en 1.500 m	3:59,27
1988	Campionato de Europa Indoor	Budapest	1ª en 1.500 m	4:05,77
1988	Xogos Olímpicos	Seúl	9ª en 1.500 m	4:02,89
1989	Campionato de Europa Indoor	A Haia	1ª en 800 m	1:59,89
1989	Campionato do Mundo Indoor	Budapest	1ª en 1.500 m	4:04,79
1989	Copa do Mundo	Barcelona	3ª en 800 m	1:56,55
1990	Campionato de Europa Indoor	Glasgow	1ª en 1.500 m	4:09,73
1990	Campionato de Europa	Split	6ª en 1.500 m	4:10,91
1991	Campionato do Mundo Indoor	Sevilla	4ª en 1.500 m	4:06,65
1991	Campionato do Mundo	Toquio	4ª en 1.500 m	4:03,19
1992	Campionato de Europa Indoor	Xénova	3ª en 1.500 m	4:06,90
1992	Xogos Olímpicos	Barcelona	7ª sf en 1.500 m	4:04,42

Marcas persoais

800 metros - 1:55,05 (Bucarest, 1 de agosto 1982)
1.500 metros - 3:56,7 (Bucarest, 12 de xullo 1986)
3.000 metros - 8:37,11 (Bucarest, 15 de xuño de 1986)