Bartolomé de Raxoi

Bartolomé de Raxoi

Biografía
Nacemento	(es) Bartolomé de Rajoy y Losada 25 de agosto de 1690 Pontedeume, España
Morte	17 de xullo de 1772 (81 anos) Santiago de Compostela, España
Arcebispo de Santiago de Compostela
12 de setembro de 1751 – 17 de xullo de 1772 ← Cayetano Gil Taboada – Francisco Alejandro de Bocanegra y Xibaja → Diocese: Arquidiocese de Santiago de Compostela
Arcebispo católico
19 de xullo de 1751 –
Capelán maior do rei
Datos persoais
País de nacionalidade	España
Relixión	Igrexa católica
Actividade
Ocupación	sacerdote católico
Lingua	Lingua castelá
Consagración	Manuel Quintano Bonifaz

Bartolomé de Raxoi e Losada, nado en Pontedeume o 24 de agosto de 1690 e finado en Santiago de Compostela o 17 de xullo de 1772, foi arcebispo de Santiago entre 1751 e 1772.

Traxectoria

Estudou gramática na súa vila natal, de onde pasou a Santiago de Compostela, ingresando no Colexio de San Xerome, obtendo o grao de bacharelato en leis. Logo de pasar á Coruña, graduouse como avogado. Posteriormente abrazou o estado eclesiástico, exercendo no cabido de Ourense e, logo, no de Lugo. En 1730 gañou a Penitenciaría de Santiago. Enviado a Madrid polo cabido compostelán, foi nomeado Comisario Xeral da Cruzada. O 30 de maio de 1751 foi designado polo rei Fernando VI de España Arcebispo de Santiago, posto que exerceu ata o seu falecemento.

Raxoi comitente

En Compostela

Pazo de Raxoi no Obradoiro

Ao longo do seu goberno ordenou unha serie de obras que contribuíron a mudar en boa parte a paisaxe urbana de Santiago. Entre elas cómpre salientar:

• A nova fachada da Acibechería, no lado norte da Catedral, aprobada en 1757.
• O novo Pazo de Raxoi (1766), que se destinaría no proxecto, en parte como seminario. Na actualidade é a sede do concello.
• A capela da Comuñón, tamén na catedral (presentación do Cabido en 1769).
• A ampliación do Pazo Episcopal coa construción de dous saíntes cara ao leste.
• O hospital de Carretas con 50 camas.
• Unha casa para mulleres arrepentidas, ao carón do hospital mencionado.
• Un Hospicio, hoxe desaparecido, para o cal obtén de El Rei a cesión duns terreos na beira do río Sarela.

En Pontedeume

Pazo de Raxoi de Pontedeume

Non esqueceu Raxoi á súa terra natal. As obras que impulsou en Pontedeume foron:

• A nova igrexa parroquial de Pontedeume, rematada en 1763, obra do mestre arquitecto Alberte Ricoi.
• A ampliación do Convento de Santo Agostiño, coa obriga de celebrar tres misas cantadas ao ano os días de Santo Agostiño, San Nicolao de Tolentino e Santo Tomás de Vilanova.
• Os almacéns ou lonxas de pescadores no peirao antigo.
• O seu propio pazo na que hoxe é a Rúa Real. A fachada está rematada por un escudo nobiliario.
• A fundación de dúas escolas para nenos e nenas.
• A construción da igrexa de San Martiño de Porto, no actual concello de Cabanas.
• A capela de Covés, hoxe desaparecida.

Véxase tamén

Bibliografía

• Couceiro Freijomil, Antonio, Historia de Pontedeume. 1926; 1995, 4ª ed.
• Otero Túñez, Ramón, Rajoy, constructor, in "Cátedra. Revista Eumesa de Estudios" (Pontedeume, 2001), nº 8, páx. 57 e ss. (en castelán)

Ligazóns externas

• Martínez, Javier Raposo (2011). "Lecturas artísticas en la biblioteca ilustrada del Arzobispo compostelano Bartolomé Rajoy y Losada (1690-1772)". Actas del I Congreso Ibero-Asiático de Hispanistas Siglo de Oro e Hispanismo general: BIADIG : Biblioteca áurea digital v.6, 2011, ISBN 84-8081-216-8, págs. 541-562 (GRISO (Grupo de Investigación Siglo de Oro Universidad de Navarra)): 541–562. ISBN 9788480812160. (en castelán)
• Trasancos, Alfredo Manuel Vigo (1993). "El arzobispo compostelano Bartolomé Rajoy y Losada (1751-1772): Gusto artístico y mecenazgo arquitectónico". Norba: revista de arte (13): 115–140. ISSN 0213-2214. (en castelán)