Comarca de Cabreira

Na Galipedia, a Wikipedia en galego.
(Redirixido desde "A Cabreira")

Cabreira (en lingua leonesa tamén Cabreira) é unha comarca situada no suroeste da provincia de León.

Localización[editar | editar a fonte]

É contigua á comarca do Bierzo, á comarca de Valdeorras, na provincia de Ourense, e á comarca de Seabra, na provincia de Zamora. Consta de cinco concellos: A Ponte, Benuza, Encinedo (Encinéu), Castrillo de Cabrera (Castriellu) e Truchas (Trueitas). A efectos administrativos adóitase dividir en Cabreira Baixa (concellos de Encinéu, Castriellu, Benuza e A Ponte) e Cabreira Alta (Trueitas). Porén, popularmente distínguese entre A Ribeira (concellos da Ponte, Benuza e Castriellu), Llousada (concello de Encinéu) e Cabreira ou Cabreira l'Alta (concello de Trueitas), conforme ás vellas divisións medievais.

Na parte máis occidental desta comarca (concello da Ponte) fálase o galego, e a lingua leonesa no resto do territorio. A superficie da comarca é de 959 km², e a súa poboación (INE, 2005) de 4.334 habitantes. A densidade de poboación é moi baixa, arredor de 4,5 hab/km².

Na comarca atópanse restos dos carrís romanos que servían para levar a auga dalgúns afluentes do río Cabreira e da conca do río Ería ata as minas de ouro das Médulas, situada nas proximidades. Tamén se atopan castros prerromanos (A Ponte, Eres e Corporales).

Na actualidade, a principal e case soa actividade económica son as canteiras de lousa, que en contrapartida do benestar económico ocasionan fortes danos á paisaxe e ao medio ambiente.

Clima[editar | editar a fonte]

O clima da comarca vén determinado por tres compoñentes principais: a altitude (entre os 376 metros da Ponte e os máis de 1200 en Forna), a influencia oceánica do Atlántico xa continentalizada, e a baixa latitude, que fan que se dean na comarca trazos climáticos mediterráneos (seca estival e temperaturas medias no verán elevadas). Conforme a estación meteorolóxica máis próxima, a media anual rolda os 12.7 graos (xaneiro 5 °C, agosto 21 °C, existen de catro a cinco meses de seca, con meses de xullo e agosto que non chegan aos 20 mm mensuais), e cunhas precipitacións totais comprendidas entre os 800 e 1100 mm, e ao redor das 2.100 horas por ano.

Serra de Cabreira