Ponte da Cigarrosa
Coordenadas: 42°23′17″N 7°06′43″O / 42.388055555556, -7.1119444444444
| Ponte da Cigarrosa | |
|---|---|
 | |
| Localización | |
| Río | Río Sil |
| Concello | Petín-A Rúa |
| Provincia | Ourense |
| Características | |
| Construción | século XVI |
| Material | Pedra |
A ponte da Cigarrosa é unha construción do século XVI que cruza o río Sil entre as parroquias de Petín e A Rúa de Valdeorras. Ten cinco arcos de diferente tamaño e forma, con catro piares tamén desiguais.
Historia[editar | editar a fonte]
Ten a súa orixe nunha construción anterior romana feita durante os reinados de Tito e Domiciano como parte da Vía Nova do itinerario de Antonino entre Braga e Astorga. Foi reconstruída en 1577 por Juan de Náveda[1] e reformada un século despois. Da época romana consérvanse no segundo piar cinco fileiras de bloques e os alicerces do cuarto piar, se ben adoitan estar cubertas pola auga. A ponte recibe o seu nome da mansión de Forum Cigurrorum, pois a zona estaba habitada pola tribo dos guigurros. A carón da ponte atopáronse unha lápida e uns mosaicos de época romana, conservados no Museo Arqueolóxico Provincial de Ourense[2][3]. En 2022 atopouse un miliario.[4].
Os cinco arcos teñen luz variable. Os catro piares teñen tallamares triangulares augas arriba, e dous tallamares augas abaixo. Catro dos arcos son apuntados, mentres que o arco segundo, que é o de maior luz, é de medio punto. O quinto arco está moi reformado, xa que foi recuberto de formigón respectando a primitiva forma apuntada ao construír o encoro de San Martiño a mediados do século XX. Pola contra, o terceiro arco ten moi pouca luz comparado cos demais arcos. Os tallamares son triangulares-apiramidados, mais debido ás sucesivas restauracións que sufriu a ponte amosan unha acusada desigualdade, non só no trazado senón tamén da fábrica construtiva.
A mediados do século XIX configurouse a estrada de segunda orde Ponferrada-Ourense, que discorría pola ponte. En 1904 levouse a cabo unha reparación dirixida por Manuel Díez Sanjurjo. A partir de 1941, tras a aprobación do Plan Peña, a estrada pasou a nomearse N-120, e xa en 1987 pasou a formar parte da OU-533, se ben por entón se construíu outra ponte paralela augas abaixo, polo que é de uso peonil.
Notas[editar | editar a fonte]
- ↑ Alvarado Feijoo-Montenegro, S. (1997): "El puente romano-medieval de A Cigarrosa (Ourense). Una interpretación constructiva". Boletín Avriense tomo XXV.
- ↑ "Mosaico da Cigarrosa" Arquivado 17 de abril de 2021 en Wayback Machine., peza do mes do Museo de Ourense, novembro de 2009.
- ↑ "A Rúa, unha pequena viaxe ao longo do tempo (1)", no blog Forum Gigorrum, xaneiro de 2010.
- ↑ "Achan en Petín un miliario romano que data do século I". Nós Diario. 7 de xullo de 2022.
Véxase tamén[editar | editar a fonte]
Bibliografía[editar | editar a fonte]
- Fernández Casado, C. (1979): "Historia del puente en España". Informes de la Construcción Vol. 31, nº 307 xaneiro-febreiro de 1979. CSIC.
- Sarmiento, M. (1758): Etimología de la voz Valdeorras y de su puente Cigarrosa.
Ligazóns externas[editar | editar a fonte]
- Ponte da Cigarrosa na páxina web colaborativa Patrimonio Galego.