Oedemera nobilis

Oedemera nobilis, femia

Oedemera nobilis é unha especie de escaravellos da familia Oedemeridae, unha especie común en Europa occidental, incluíndo o sur de Inglaterra.

Morfoloxía

O macho de Oedemera nobilis, como na maioría das especies de Oedemera, posúe uns fémures posteriores moi inchados, mentres que nas femias son delgados; os élitros están moi estreitados cara aos ápices e non ocultan o segundo par de ás membranosas. É de cor verde viva, frecuentemente cun ton dourado ou cobre; algúns individuos son azuis ou violetas. Só se pode confundir con Oedemera flavipes, do cal difire na súa cor, así como pola longa pubescencia branca da cabeza, pronoto e tibias posteriores dos machos.

Bioloxía e ecoloxía

Abunda en primavera sobre varias especies de flores; os machos son moi rechamantes polos seus fémures inchados e cor verde brillante. Aliméntase de pole e néctar de plantas Asteraceae, Cyperaceae, Convolvulaceae, Cruciferae, Dipsacaceae, Scrophulariaceae, Poaceae, Papaveraceae, Plantaginaceae, Rosaceae, Rubiaceae e Apiaceae. As larvas desenvólvense en talos secos de Spartium e Cirsium.

Distribución

Europa occidental e do sur, desde a Península Ibérica a Grecia; é moi común nos países mediterráneos e penetra en Europa central ata a metade de Alemaña e as Illas Británicas; chega a Dinamarca, onde é raro e esporádico. Tamén se rexistrou no Maghreb. Está ausente nos países alpinos e no leste de Europa.

Galería

• 
  Macho de Oedemera nobilis nunha Rosaceae
• 
  Femia de Oedemera nobilis en Galicia cos seus fémures delgados
• 
  Macho de Oedemera nobilis en Galicia cun brillo de cobre na cabeza e pronoto
• 
  Macho de Oedemera flavipes, sempre de cor máis escura que Oedemera nobilis
• 
  Oedemera nobilis, macho (Monte Calvo, Val della Torre, preto de Turín, Italia)

Véxase tamén

Ligazóns externas

• Fauna Ibérica (en castelán)
• European fauna of Oedemeridae (en inglés)