Arante, Ribadeo

Arante
Igrexa das Virtudes na Ponte.
Concello	Ribadeo
Área	14,09 km²
Poboación	(Ano 2004) 271 hab.
Densidade	108,1 hab./km²
Entidades de poboación	8

San Pedro de Arante é unha parroquia do concello lugués de Ribadeo e eclesiasticamente ó arciprestado da Ría de Abres.

Xeografía

Limita coas parroquias de Covelas, Cedofeita, Vidal e A Fórnea (Trabada) e Vilamartín Pequeno (Barreiros); tamén limita cara o norte cos montes de Penalonga e o Alto do Móndigo. Entre os seus regatos e río destacan o Lexoso (cara o norleste) e o Arante (que fai de entronque co anterior e que, dirixíndose o sur, pasará a chamarse río Grande).

Aínda que é unha das parroquias máis montañosas de Ribadeo, cunha altitude media de 440 m. ten dous vales: o sector central, regado polo río Arante e o sector norte, regado polo río Lexoso (que é onde vive a meirande parte da poboación). Os 271 habitantes, segundo o censo de 2004, están agrupados en 8 entidades e 5 lugares, cunha densidade media 19,2 hab/km2.

As entidades de poboación son O Barredal (27), Os Bestilleiros (23), Cei (44), Cima de Vila (17), Fondo de Vila (23), A Ponte (14), Remourelle (98) e Vilamariz (25). Os lugares (que adoitan formar parte dalgunhas das entidades) son Os Fornos, A Madanela, As Pereiriñas, Portobragán e Rego de Mel.

A parroquia está documentada como Alanti.

Situación xeográfica
Mapa de situación en Galicia da parroquia Arante, Ribadeo
Concello ó que pertence: Ribadeo

Historia

A parroquia de Arante aparece citada en varias ocasións no libro de Francisco Lanza "Ribadeo Antigo", referíndose a existencia dun castro levantado sobre un montículo natural. Dentro de termo existen varias capelas, como a de Santa María Madalena, no barrio de Remourelle, e a da Nosa Señora das Virtudes no da Ponte. Pero segundo outras fontes a parroquia recibe o seu nome do río Arante que flúe ó pé do seu val. Este nome está formado pola raíz indoeuropea Ar (correr, fluír), e polo sufixo ante, moi frecuente en formacións preromanas de raíces hidronímicas, como Serantes, Amarante, etc.

Patrimonio

Ademais das capelas mencionadas, destaca a igrexa parroquial de San Pedro de Arante, do século XVIII. Dispón dunha nave central cuberta por bóveda de canón e arcos de medio punto que remata noutra bóveda de pavillón sobre tres arcos de pedra, tamén de medio punto. No seu interior, tres retablos: dous deles barrocos e o outro clásico.

Xa na aldea da Ponte (ademais da capela) resalta a celebración dunha romaría de orixe medieval, que conmemora a vitoria sobre os franceses. É unha festa de gran colorido onde se sacuden uns pendóns de cores. Ten un gran valor histórico a recuperación realizada nestes últimos anos desta festa.

Festas

A festa patronal, na honra de San Pedro, é o 29 de xuño, celebrándose cunha pequena procesión.
Celebra a Festa das Cruces sete semanas despois da Semana Santa. É unha pequena romaría e procesión na que se levan sete cruces de sete parroquias distintas, (que simbolizan as sete parroquias orixinarias do concello).
O 21 de agosto celébrase a Festa da Magdalena.

Véxase tamén

Outros artigos

• Lugares de Ribadeo