A Song of Ice and Fire

Na Galipedia, a Wikipedia en galego.
A Song of Ice and Fire
Título orixinal A Song of Ice and Fire
Autor George R. R. Martin
País Estados Unidos
Lingua Inglés
Xénero(s) Novela
Data de pub. Flag of the United States.svg agosto de 1996–presente

A Song of Ice and Fire (en galego Canción de xeo e lume) é unha serie de novelas de George R. R. Martin (algunhas aínda non publicadas) do xénero de fantasía épica e acadou un grande éxito de crítica e público. Martin comezou a escribir a serie en 1991 e o primeiro volume publicouse en 1996. Orixinalmente ía ser unha triloxía, mais a serie consiste en cinco volumes publicados e dous máis proxectados. Tamén hai dúas novelas curtas dispoñíbeis, e algunhas máis plantexadas. A serie está traducida a 18 linguas, e o cuarto volume chegou á primeira posición dos libros máis vendidos do New York Times.[1] En total, a serie vendeu máis de 2,2 millóns de copias nos Estados Unidos.[2]

A historia ten lugar nun mundo de ficción, principalmente nun continente chamado Westeros, unha terra dividida en sete reines diferentes. As casas nobres enfróntanse en guerras e traizóns por conseguir dominar ós seus inimigos, nunha era semellante á Idade Media. A pesar de que a historia principal ten lugar neste continente, tamén se narran os sucesos que ocorren alén do mar, noutra parte do mundo. A maior parte dos personaxes son humanos, pero mentres a serie avanza vanse introducindo novas criaturas, como os Outros (unha especie de non-mortos) do norte e os dragóns do leste, as cales todo o mundo daba por extintas. Hai tres puntos argumentais principais na serie: a crónica dunha guerra civil dinástica entre as diferentes familias polo control de Westeros; ameaza crecente dos Outros que comezan a reunirse ó outro lado do gran valado de xeo que forma a fronteira norte de Westeros; e a viaxe de Daenerys Targaryen, a filla exiliada do rei que foi asasinado noutra guerra civil fai quince anos (Guerra do Usurpador) e busca tornar a Westeros para reclamar o seu dereito ó trono.

Apréciase a influencia de universos como o de J.R.R. Tolkien, se ben nestes libros hai unha gran influencia da historia (moitos dos sucesos inspíranse na chamada Guerra das dúas rosas en Inglaterra) e aparece menos maxia. A serie recibiu eloxios polo seu realismo, xa que somete a aparición da maxia en favor das batallas e intrigas políticas. A violencia, a sexualidade e a ambigüidade moral amósanse con frecuencia entre un conxunto de máis de mil personaxes con nome. Algúns dos principais personaxes son repentinamente eliminados para que os lectores non podan confiar en protagonistas invulnerables. A estrutura narrativa do punto de vista de múltiple permite ós lectores explorar o mundo dende moitas perspectivas, e isto permite ademais que os supostos malvados poidan ofrecer o seu punto de vista. A Song of Ice and Fire tamén recibiu comentarios críticos pola súa interpretación diversa do feminismo e a relixión.

Orixinalmente publicado sen demasiada publicidade, os libros da serie acadaron máis de 22 millóns de copias arredor do mundo e foron traducidos a máis de 20 linguas.

Argumento[editar | editar a fonte]

Artigo principal: Mundo de A Song of Ice and Fire.
Corominas con Cristina Macía, ilustrador das portadas e tradutora ao castelán, respectivamente, de A Song of Ice and Fire, en Avilés, durante o festival Celsius 232.

A historia de A Song of Ice and Fire ten lugar nun mundo ficticio no que as estacións poden durar varios anos. Centos de anos antes dos eventos da primeira novela, os sete reinos do continente de Westeros foron unificados por varias xeracións da dinastía Targaryen, que empregaron o poder dos dragóns ata a súa extinción aparente. O derradeiro rei Targaryen foi asasinado nunha rebelión dos señores feudais liderados polo xove Robert Baratheon, feitos que ocorreron catorce anos anos dos eventos da primeira novela.

A historia principal conta a loita de poder de varios personaxes por conquistar o Trono de Ferro despois da morte do Rei Robert, o cal ocorreu no primeiro libro, A Game of Thrones. O fillo de Robert, Joffrey, reclama inmediatamente o Trono mediante o apoio do poder da familia da súa nai, a inmensamente rica Casa Lannister. Cando Lord Eddard Stark, a "Man" do Rei Robert, é executado despois de descubrir que Joffrey e os seus irmáns non eran fillos de Robert, os irmáns de Robert, Stannis e Renly, reclaman cada un o trono para si mesmos. Mentres tanto, varias rexións de Westeros buscan recuperar a autonomía política: o fillo maior de Eddard Stark, Robb, é proclamado Rei do Norte, e Balon Greyjoy re-establece un reino independente na súa rexión, as Illas de Ferro.

A segunda trama da historia ten lugar na zona norte de Westeros, onde un colosal muro de xeo de oito mil anos de antigüidade defende Westeros dos Outros, criaturas que se pensan que son só un mito ó comezo da historia. Os sentinelas do muro, a Irmandade Xuramentada dos Gardiáns da Noite (Night's Watch), pasan la maior parte das súas vidas tratando cos salvaxes humanos que viven alén do muro cando os outros aparecen por primeira vez en A Game of Thrones. A historia dos Gardiáns da Noite é contada principalmente dende a perspectiva de Jon Snow, o fillo ilexítimo de Eddard Stark, que se une ás filas da Guarda e e descobre a verdadeira natureza da ameaza do norte. No terceiro volume, A Storm of Swords, esta historia entróncase coa guerra civil do sur cando Stannis viaxa ata o Muro para protexer o reino da ameaza da invasión e ó mesmo tempo gañar o favor das prazas fortes do norte.

A terceira historia está ambientada no gran continente do leste, chamado Essos e segue as aventuras de Daenerys Targaryen, a derradeira descendente coñecida da casa Targaryen. A súa historia está illada das demais ata que se atopa con outros personaxes en A Dance with Dragons. Vivindo no exilio en Essos, as aventuras de Daenerys amosan a súa capacidade de medrar e superar as dificultades, xa dende que foi vendida a un bárbaro señor da guerra, por un matrimonio de conveniencia. O seu ascenso é axudado polo nacemento de tres dragóns dos ovos de dragón fosilizados que lle agasallaron na súa voda. O escudo de armas da súa é un dragón de tres cabezas, e por iso estas criaturas teñen un gran valor simbólico para ela antes de que crezan o suficientemente como para ser de empregados tacticamente para cumprir o seu obxectivo de recuperar o Trono de Ferro.

Novelas e novelas curtas[editar | editar a fonte]

Tamén hai tres novelas curtas con extractos de capítulos das novelas:

  • Blood of the Dragon é unha novela curta a feita cos capítulos de Daenerys Targaryen de A Game of Thrones. Gañou o Premio Hugo á mellor novela curta de 1997.
  • Path of the Dragon é unha novela curta cos capítulos de Daenerys Targaryen, recollidos desta vez do libro A Storm of Swords.
  • Arms of the Kraken é una novela curta baseada nos capítulos das Illas de Ferro de A Dance with Dragons.

Tamén hai tres novelas curtas baseadas no mesmo mundo fantástico. Os acontecementos teñen lugar uns noventa anos antes das novelas e non teñen conexión directa co argumento de Song of Ice and Fire.

  • The Hedge Night (1998)
  • The Sworn Sword (2003)
  • The Mystery Knight (2010)

Notas[editar | editar a fonte]

Véxase tamén[editar | editar a fonte]

Commons
Commons ten máis contidos multimedia na categoría: A Song of Ice and Fire Modificar a ligazón no Wikidata

Ligazóns externas[editar | editar a fonte]