Xi Chuan
| Nome orixinal | Liu Jun |
|---|---|
| Biografía | |
| Nacemento | 1963 Xuzhou, provincia de Jiangsu, República Popular da China |
| Datos persoais | |
| País de nacionalidade | Chinesa |
| Educación | Universidade de Beijing |
| Actividade | |
| Ocupación | Escritor, tradutor, ensaísta |
| Período de actividade | Séculos XX e XXI |
| Xénero artístico | Poesía, ensaio |
| Lingua | Chinés |
| Premios | |
| Premio Lu Xun de literatura | |
Lista
| |
Xi Chuan (chinés simplificado: 西川; pinyin: Xī Chuān), pseudónimo de Liu Jun (chinés simplificado: 刘军; pinyin: Liú Jūn), nado en Xuzhou no 1963, é un poeta, ensaísta e tradutor chinés.[1][2] É considerado un dos autores máis influentes da poesía chinesa contemporánea.[2][3] Ademais de poesía, publicou dous volumes de ensaios, un libro de crítica literaria, unha obra de teatro e traducións de escritores como Pound, Borges ou Miłosz.[4]
Traxectoria[editar | editar a fonte]
Xi Chuan naceu en Xuzhou, na provincia de Jiangsu, mais medrou en Beijing.[5] Alí, estudou nunha escola de linguas estranxeiras para diplomáticos.[5] Despois, matriculouse na Universidade de Beijing, onde se graduou en Lingua Inglesa.[5] A súa tese de fin de carreira versou sobre as traducións da poesía chinesa realizadas por Ezra Pound.[5] Foi nesta época que adoptou o seu pseudónimo, Xi Chuan (literalmente, "río do oeste").[5] Traballou como editor das revistas Huangqiu ("O globo") e Qingxiang ("Tendencia"), da que foi fundador.[6][7] Este último foi un magazine literario independente que se publicou entre o 1988 e o 1992, cando foi clausurado polas autoridades, tras só tres números.[7] Entre o 1990 e o 1995, foi un dos editores da revista Xiandai han shi 现代汉诗 ("Poesía han moderna").[7][8] Tamén actuou na película Zhantai 站台 ("Plataforma", 2000), de Jia Zhangke.[6]
Gañou fama durante o período de liberalización económica de finais dos oitenta.[3] No 1989, faleceron dous dos seus amigos máis próximos, tamén poetas e estudantes da Universidade de Beijing.[6] Hai Zi suicidouse o 26 de marzo, aos vinte e cinco anos de idade; Luo Yihe morreu dunha hemorraxia cerebral o 31 de maio, aos vinte e oito.[6] Esta perda, xunto co fracaso das protestas da praza Tian'anmen, levouno a deixar de escribir durante dous anos.[3][5] O parón converteu o seu verso, condensado e lírico, no que se mesturaban influencias do modernismo occidental coa tradición clásica chinesa, nunha sorte de prosa meditabunda, moi afastada do seu anterior esteticismo e musicalidade.[3] Este novo estilo combina prosa e verso para artellar o que Xi chama unha pseudofilosofía (wei zhexue 未哲学), que procura afondar nos recunchos máis escuros da realidade humana.[8]
Na actualidade, é profesor de literatura chinesa clásica e contemporánea na Academia Central de Belas Artes de Beijing.[1][2] Xa tiña ensinado literatura occidental e inglés.[5] Foi profesor invitado en universidades estranxeiras, como a Universidade de Nova York ou a Universidade de Victoria.[4] Gañou premios en varios países, incluída unha bolsa da UNESCO.[6][8] É director da revista Dangdai guoji shitan 当代国际诗坛 ("Poesía contemporánea internacional").[8] Editou as obras póstumas do seu amigo Hai Zi.[8]
Premios[editar | editar a fonte]
- Premio de poesía chinesa moderna (1994).[1][2]
- Premio Lu Xun de literatura (2001).[1][2]
- Premio Zhuang Zhongwen de literatura (2003).[1][2]
Obra[editar | editar a fonte]
Ensaio[editar | editar a fonte]
- Shuizi 水渍 ("Marcas de auga", 2001).
- Youdang yu xiantan: yi ge zhongguoren de yindu zhi xing 游荡于闲谈：一个中国人的印度之行 ("Derivas e conversas: a marcha dun chinés á India", 2004).
Poesía[editar | editar a fonte]
- Zhongguo de meigui 中国的玫瑰 ("Rosas chinesas", 1991).
- Zhijing 致敬 ("Tributo", 1992).
- Xugou de jiapu 虚构的家谱 ("Xenealoxía ficticia", 1997).
- Yinmi de huihe 隐秘的汇合 ("Converxencia secreta", 1997).
- Dayi ruci 大意如此 ("Máis ou menos", 1997).
- Ying de huayu 鹰的话语 ("As palabras da aguia", 1999).
- Xi Chuan de shi 西川的诗 ("A poesía de Xi Chuan", 1999).
- Shenqian 深浅 ("O fondo e o superficial", 2006).
- Geren haowu 个人好恶 ("Preferencias persoais", 2008).
- Gou yi meng 够一梦 ("Abonda un soño", 2013).
Traducións[editar | editar a fonte]
- Xi Chuan (2017). Murciélagos al atardecer. Tradución ao castelán de Miguel Ángel Petrecca. Bajo la Luna. ISBN 9789874422040
- Xi Chuan (2020). Entierro mi cola: Antología poética. Tradución directa ao castelán de Roberto H. E. Oest e Jia Yangsheng. Huerga y Fierro. ISBN 9788412179231
Notas[editar | editar a fonte]
- ↑ 1,0 1,1 1,2 1,3 1,4 "Xi Chuan". www.ndbooks.com (en inglés). Consultado o 2023-12-28.
- ↑ 2,0 2,1 2,2 2,3 2,4 2,5 Poets, Academy of American. "Xi Chuan". Poets.org (en inglés). Consultado o 2023-12-28.
- ↑ 3,0 3,1 3,2 3,3 "Notes on the Mosquito". www.ndbooks.com (en inglés). Consultado o 2023-12-28.
- ↑ 4,0 4,1 "In the Shadow of Oxymoron - The International Writing Program". iwp.uiowa.edu. Consultado o 2023-12-28.
- ↑ 5,0 5,1 5,2 5,3 5,4 5,5 5,6 "Lucas Klein on Xi Chuan and translating “Written at Thirty”". Poetry Society of America (en inglés). Consultado o 2023-12-28.
- ↑ 6,0 6,1 6,2 6,3 6,4 "Notes on the mosquito : selected poems". search.worldcat.org (en inglés). Consultado o 2023-12-28.
- ↑ 7,0 7,1 7,2 "Xi Chuan". web.archive.org. 2010-01-15. Archived from the original on 15 de xaneiro de 2010. Consultado o 2023-12-28.
- ↑ 8,0 8,1 8,2 8,3 8,4 "Xi Chuan 西川". china traducida y por traducir (en castelán). 2011-03-12. Consultado o 2023-12-28.
Véxase tamén[editar | editar a fonte]
Ligazóns externas[editar | editar a fonte]
- 西川 (La literatura china traducida en España)
