Xeografía de Vigo

Na Galipedia, a Wikipedia en galego.

Vigo limita ao norte coa Ría de Vigo, ao nordés co concello de Redondela, ao leste co de Mos, ao sur cos concellos de O Porriño e Gondomar, e ao suroeste co concello de Nigrán.

Zonas[editar | editar a fonte]

A cidade presenta unha topografía variada na que se suceden áreas deprimidas e sectores elevados, zonas case chás e outras en pendente, estando o seu centro nun monte, O Castro. Isto fai que moitas das rúas dos barrios centrais sexan pendentes moi pronunciadas. Todo este conxunto de situacións son froito da acción de procesos tectónicos e axentes erosivos que incidiron sobre determinado tipo de materiais rochosos presentes na vertente da ría en que a cidade se atopa. Todo isto marca unhas diferenzas que determinan a división do territorio en tres sectores: a costa, o Val do Fragoso e as zonas altas do interior.

Costa[editar | editar a fonte]

Un primeiro sector confórmao a costa, dividida nunha área litoral en contacto co mar e unha franxa de territorio, máis ou menos ampla, que penetra levemente cara o interior. O litoral viuse afectado pola erosión mariña xurdindo como consecuencia diso zonas de areal e zonas rochosas. Ademais, a acción mariña provoca os entrantes e saíntes da costa. Todo isto provoca que entre Saiáns e Teis existan vinte areais, dous tramos de costa sedimentaria, O Vao-Samil e Monduiña-Canido, e tres tramos de costa de erosión en A Guía, Alcabre e Oia-Saiáns. As marismas, formadas pola desembocadura do Lagares, son froito da sedimentación efectuada tanto polo mar coma polo río.

Dorsal entre a costa e o Val do Fragoso[editar | editar a fonte]

Entre o litoral e o Val do Fragoso aparece un relevo secundario de grande importancia ao ser onde se emprazou a cidade consolidada. Trátase dunha pequena dorsal de dirección latitudinal que separa o Val do Fragoso desta marxe da ría.

Val do Fragoso[editar | editar a fonte]

O Val do Fragoso, polo que pasan o río Lagares e afluentes, posúe relevos suaves e incluso algunhas zonas chás. Este val presenta unha clara disimetría. A vertente sur presenta unha topografía moito máis irregular e é onde se atopan os afluentes de maior importancia có Lagares, coma os ríos Eifonso ou Barxa. A vertente norte acada nalgunhas zonas fortes pendentes ao chocaren coas ladeiras meridionais da aliñación O Castro-Candeán.

Val do Miñor[editar | editar a fonte]

O Val Miñor está separado do Val do Fragoso polas estribacións da Serra do Galiñeiro cara o norte e o nordeste. O interfluvio que separa ambos os dous vales conta cunha elevada altitude relativa, dando lugar a fortes pendentes na súa vertente setentrional, mentres que na súa vertente meridional, a elevada altitude das terras do redor fai do val unha zona moi abrigada onde se dan características climáticas propias.

Zona montañosa[editar | editar a fonte]

A zona montañosa ten un relevo accidentado, pois aparecen en ocasións fortes pendentes, sobre todo no sector sueste, que son zonas de fortes pendentes e contrastes topográficos.

As alturas máis salientables do concello son o monte Galiñeiro (situado en Gondomar, concello co que serve de linde), localizado no sector setentrional da serra do Galiñeiro e é a localización máis ao sur do termo municipal, e que é un monte de silueta inconfundible que se identifica desde moitos puntos da mancomunidade.

O Monte Alba, de 524 m de altitude, e o Monte O Cepudo, de 526, son dúas elevacións xemelgas. Ao norte elévase un pequeno monte de 386 m e ao oeste e noroeste están os montes de Coruxo (Avilleira, Chan da Lagoa e outros), de menor altura e fortes pendentes.

Outras alturas a destacar que crean fortes pendentes no nordeste son A Madroa e o Monte Vixiador, que ten a súa altura máxima no concello de Redondela.

Ría de Vigo[editar | editar a fonte]

Na ría de Vigo hai que salientar as Illas Cíes á entrada e ao fondo as bateas mexilloneiras e a ponte de Rande. Na marxe dereita da ría aséntase a Cidade Olívica e na marxe esquerda a península do Morrazo.

Véxase tamén[editar | editar a fonte]

Bibliografía[editar | editar a fonte]

  • "Guía cidadá de Vigo y su área metropolitana", Faro de Vigo (2002). Depósito legal: V-5016-2002.