Theodore Kaczynski

Theodore Kaczynski
Nome completo	Theodore John Kaczynski
Alcume	Unabomber
Nacemento	22 de maio de 1942
Lugar de nacemento	Evergreen Park
Nacionalidade	Estados Unidos de América
Etnia	Polish Americans
Relixión	ateísmo
Alma máter	Universidade Harvard, Universidade de Míchigan, Evergreen Park Community High School District 231 e Eliot House
Ocupación	matemático, escritor, terrorista, filósofo, ecoloxista, asasino en serie e criminal
Pai	Theodore Richard Kaczynski
Nai	Wanda Dombek
Irmáns	David Kaczynski
Movemento	anarquismo, anarcoprimitivismo
Coñecido por	Manifesto Unabomber
Na rede
[ editar datos en Wikidata ]

Theodore Kaczynski tras a súa detención

Theodore John Kaczynski, nado en Chicago (Illinois) o 22 de maio de 1942, máis coñecido co alcume de Unabomber, é un matemático, filósofo, neoludita e terrorista estadounidense, que se dedicou á fabricación e envío de cartas e paquetes bomba, motivado e influenciado por un pensamento crítico da sociedade actual.

Traxectoria

Ted Kaczynski amosou grandes capacidades intelectuais dende unha curta idade. Kaczynski graduouse na Universidade de Harvard, obtendo posteriormente un doutoramento en matemáticas pola Universidade de Míchigan. Ao rematar a súa formación académica, comezou a exercer como profesor asociado na Universidade de Berkeley á idade de 25 anos no ano 1967, ata a súa dimisión dous anos máis tarde.

Tras a súa dimisión en Berkeley, Kaczynski mudouse en 1971 a Lincoln, Montana para vivir nunha cabana artesá feita por el mesmo, a cal carecía de electricidade e auga corrente. En 1978 comezou a fabricar bombas, que enviou a distintos obxectivos empregando o Servizo Postal dos EUA. A súa actividade terrorista durou dende o 1978 ata a súa detención en 1995. Os obxectivos principais de Kaczynski eran universidades e aeroportos. Atentar contra un avión está contemplado como delito federal nos EUA, polo que o caso pasou a mans do FBI, que o nomeou baixo o acrónimo UNABOMB (do inglés University and Airline Bomber)

Manifesto Unabomber

En 1995, Kaczynski escribiu un manifesto denotando os seus principios, titulado A sociedade industrial e o seu futuro. O manifesto foi enviado ao New York Times e o Washington Post baixo o pseudónimo de FC (Freedom Club). No ensaio, amosa o seu descontento coa sociedade tecnolóxica actual, produto da Revolución Industrial, argumentando que a tecnoloxía supón un obstáculo para a liberdade humana. Kaczynski solicitou a publicación íntegra do seu manifesto a cambio de poñer fin á súa actividade terrorista. Despois de deliberalo, ambos os dos xornais decidiron publicar o manifesto completo, que na cultura popular pasou a coñecerse baixo o alcume de Manifesto Unabomber. Ao mesmo tempo, as autoridades pediron a colaboración cidadá para a súa detención, esperando que algunha persoa recoñecese o xeito de escribir de Ted.

O seu irmán David Kaczynski recoñeceu no manifesto diversas expresión propias do seu irmán e púxose en contacto coas autoridades. Theodore Kaczynski foi detido na súa cabana en Montana o 3 de abril de 1996. No interior, o FBI atopou varios compoñentes para construír bombas así como unha bomba xa preparada, un xornal de 40.000 páxinas con experimentos detallados e descricións dos crimes de Unabomber e o que semellaba ser o manuscrito orixinal do Manifesto Unabomber.

Kaczynski foi condenado a 8 cadeas perpetuas sen posibilidade de liberdade condicional. Actualmente, atópase retido no ADX Florence, un centro penitenciario no condado de Freemont, Colorado, cumprindo a súa condena.

Véxase tamén

Ligazóns externas

• Manifesto Unabomber orixinal publicado no Washington Post (en inglés)
• Manifesto Unabomber (en castelán)

---

Este artigo sobre unha personalidade é, polo de agora, só un bosquexo. Traballa nel para axudar a contribuír a que a Galipedia mellore e medre.  Existen igualmente outros artigos relacionados con este tema nos que tamén podes contribuír.

---