Speculum Maius

Speculum Maius
Autor/a	Vincent de Beauvais
Lingua	lingua latina
Xénero(s)	enciclopedia
[ editar datos en Wikidata ]

Speculum Maius é o nome da enciclopedia medieval de Vincent de Beauvais, unha das obras de referencia máis ambiciosas da época, con aproximadamente 3 millóns de palabras. O seu título, que significa Grande espello, resume a pretensión de reflectir por escrito todo o coñecemento dispoñíbel. Publicado no século XIII, gozou dunha considerable difusión até o Renacemento.

Estrutura

A enciclopedia consta de tres partes: Speculum Naturale, Speculum Doctrinale e Speculum Historiale, que tratan sobre a natureza, a ciencia e a historia respectivamente. Posteriormente engadiuse un volume apócrifo sobre a moral, recollendo pensamento de diversos autores.

A obra foi amplamente difundida e conservada en diversos manuscritos. A crítica textual identificou as familias que transmitiron a obra: para a primeira e a segunda parte hai dúas, a versión Tournai e a Douai (a máis aceptada) mentres que para a terceira, a de maior éxito, ademais do exemplar Douai, consérvanse catro versións máis.

Speculum Naturale

O primeiro volume narra como se produciu a Creación, seguindo o punto de vista do Xénese pero incorporando achados de diversos pensadores cristiáns e pagáns. Comeza explicando a doutrina da Santísima Trindade e as características dos anxos e máis tarde indica como foron creados e os atributos da luz e os catro elementos clásicos, a esencia de todo o que existe. Máis tarde recrea a traizón de Lucifer e reflexiona sobre o tempo e a cosmoloxía imperantes.

A medida que se achega á Terra, resume as nocións de xeografía da Idade Media e fai un compendio completo de seres vivos coñecidos, cada un con atributos médicos asociados. Finalmente, incorpora un tratado de anatomía humana.

Speculum Doutrinal

Este volume aborda cuestións relacionadas coa educación e os diferentes oficios, abranguendo tanto os conceptos básicos de trivium e quadrivium como as nocións das distintas ciencias. Inclúe un pequeno dicionario latino e algunhas das historias máis famosas da antigüidade greco-latina.

Nesta segunda parte tamén resume a súa filosofía, de carácter escolástico. Destacan os tratados das distintas virtudes. Máis tarde deu consellos sobre as artes prácticas, seguindo a división de coñecementos de Hugo de San Víctor . Tamén hai un capítulo relevante sobre música, que segue a Boecio.

Speculum Historiale

O terceiro volume resume a historia do mundo até 1250, seguindo de preto o Chronicon de Hélinand de Froidmont. Comeza cos relatos da Biblia, conta as lendas de Babilonia, detense principalmente na época grega e romana e continúa explicando os acontecementos máis importantes de Oriente. A continuación céntrase na Europa medieval, destacando a contribución de Carlomagno e dos distintos reinos. A sección tamén consta dunha lista de autores literarios famosos.