Soiuz MS-19

Soiuz MS-19
A Soiuz MS-19 achegándose á estación.
Tipo	Tripulada
Data de lanzamento	5 de outubro de 2021
Foguete portador	Soiuz 2-1a
Sitio de lanzamento	Cosmódromo de Baikonur
Obxectivo da misión	Acoplamento coa Estación Espacial Internacional.
Regreso	30 de marzo de 2022
NSSDC ID	2021-089A

Soiuz MS-19 foi unha misión espacial tripulada rusa lanzada o 5 de outubro de 2021 mediante o un foguete Soiuz 2-1a desde o cosmódromo de Baikonur.

Características

Soiuz MS-19, unha Soiuz modelo MS cos cosmonautas Anton Shkaplerov, Yulia Peresild e Klim Shipenko a bordo (a tripulación de respaldo eran Oleg Artemiev, Alena Mordovina e Aleksei Dudin), foi unha misión lanzada para acoplarse coa Estación Espacial Internacional. Unha vez en órbita chegou á estación seguindo unha traxectoria rápida de tres horas, acoplándose ao módulo Rassvet e coa tripulación uníndose aos membros das Soiuz MS-18 xa a bordo, cuxa partida marcou o inicio da Expedición 66.

A Soiuz MS-19 levou á actriz Yulia Peresild e ao director Klim Shipenko a bordo da estación espacial para rodar parte dunha película de ciencia ficción. A película, titulada Vyzov (Вызов, en ruso), trata dunha cirurxiá enviada á estación para tratar a un cosmonauta enfermo. A rodaxe contou coa aprobación da NASA para gravar no segmento americano. Peresild e Shipenko volveron á Terra na Soiuz MS-18, tras 12 días no espazo.

Selo conmemorando a película Vyzov, rodada en parte na estación espacial.

A invasión rusa de Ucraína, o 24 de febreiro de 2022, provocou un corte nas relacións entre os Estados Unidos e Rusia, co que a NASA chegou a considerar outros medios para traer de volta a Mark Vande Hei. Finalmente, Vande Hei regresou na Soiuz MS-19, como estaba previsto, xunto con Anton Shkaplerov e Petr Dubrov, tras 176 días en órbita. A nave chegou a terra o 30 de marzo de 2022, a 147 km ao sueste da cidade de Dzhezkazgan (Casaquistán).

Véxase tamén

Outros artigos

• Soiuz 2-1a
• Estación Espacial Internacional