Ornitina

Na Galipedia, a Wikipedia en galego.
L-Ornitina.
Nome IUPAC: L-Ornitina.
Outros nomes:
ácido (+)-(S)-2,5-diaminovalérico,
ácido (+)-(S)-2,5-diaminopentanoico.
Número CAS: 70-26-8.

A ornitina é un aminoácido que intervén no ciclo da urea [1] [2]. Contén un grupo amino na súa cadea lateral, e non é un aminoácido proteinoxénico, polo que non forma parte das proteínas. A ornitina acumúlase en cantidades anormais no corpo en casos de deficiencia de ornitina transcarbamilase.

No ciclo da urea[editar | editar a fonte]

Artigo principal: Ciclo da urea.

A función principal da ornitina no noso corpo é intervir no ciclo da urea, o cal elimina o exceso de nitróxeno do organismo. A L-ornitina é un dos produtos orixinados polo encima arxinase Este encima transforma a L-arxinina (un composto guanidinio) en urea e ornitina. Por tanto, a ornitina é un metabolito central no ciclo da urea. A ornitina recíclase e, en certa maneira, é un catalizador. No ciclo da urea o nitróxeno da ornitina permanece intacto, xa que os nitróxenos que incorpora a urea proceden do carbamoíl fosfato (fosfato-CONH2) e do aspartato.

Biosíntese de arxinina[editar | editar a fonte]

Lactamización da ornitina.

A ornitina non é un dos aminoácido codificados no código xenético, e, por tanto, non está implicada na síntese de proteínas. Porén, nos tecidos non hepáticos dos mamíferos, o principal uso que se lle dá á ornitina é a biosíntese de arxinina, o que fai que a ornitina sexa bastante importante como intermediario dos procesos metabólicos. Crese que non forma parte dos aminoácidos do código xenético porque os polipéptidos que contivesen ornitina desprotexida sufrirían unha lactamización espontánea. [3]

Outras reaccións[editar | editar a fonte]

A ornitina por acción da ornitina descarboxilase (E.C. 4.1.1.17), é o punto de partida para a síntese de poliaminas como a putrescina.

Nas bacterias, como Escherichia coli, a ornitina pode sintetizarse a partir do L-glutamato.[4]

A ornitina é tamén o punto de partida para a biosíntese da cocaína, cando se descarboxila e despois é moi modificada polo citocromo P450.

Notas[editar | editar a fonte]

  1. PubChem compound Ornithine
  2. ChemSpider L-Ornithine
  3. Arthur L. Weber and Stanley L. Miller (1981). "Reasons for the Occurrence of the Twenty Coded Protein Amino Acids". J. Mol. Evol. 17 (5): 273–284. DOI:10.1007/BF01795749. PMID 7277510. http://physwww.mcmaster.ca/~higgsp/3D03/WeberReasons.pdf. 
  4. "Ornithine Biosynthesis". School of Biological and Chemical Sciences, Queen Mary, University of London. http://www.chem.qmul.ac.uk/iubmb/enzyme/reaction/AminoAcid/Orn.html. Consultado o 20-05-2012. .