Luis Freire

Na Galipedia, a Wikipedia en galego.
(Redirixido desde "Luis Freire García")
Luis Freire
Nacemento 1914
Falecemento 1997
Nacionalidade España
editar datos en Wikidata ]

Luis Freire García, nado na Coruña en 1914 e finado en Vigo en 1997, foi un botánico e micólogo galego.

Traxectoria[editar | editar a fonte]

Os seus avós paternos foron Juan Freire, traballador de La Voz de Galicia e Bruna Eiroa, natural de Pravio (Cambre). Tiveron tres fillos: José, Juan e Luis.

Criouse entre os 3 e os 12 anos en Vilalba, coa súa familia pero en casa dos seus avós maternos, volvendo despois á Coruña. Estudou por libre o bacharelato elemental en só dous anos, despois fixo a reválida e o bacharelato superior. Exerceu de practicante. Posteriormente desenvolveu a afección polo estudo dos insectos, arañas e plantas.[1]

Comezou Bioloxía na Universidade de Santiago de Compostela aos 57 anos, tras enviuvar, rematando en catro anos (1975) e realizando posteriormente a tese de licenciatura e a tese de doutoramento, no 1981, sobre "Macromicetos da Selva Negra".

Impartiu clases de Botánica, e a súa aula estaba tan concorrida que moitos alumnos asistían de pé «porque non se cabía», recorda sempre Marisa Castro, a compañeira de Luís e tamén micóloga de prestixio.[2]

Codirixiu cinco teses de licenciatura sobre flora e micoloxía de Galicia mentres preparaba a súa de doutoramento, ás que hai que engadir outras oito posteriormente. Publicou máis de 40 artigos, 4 libros e dirixiu dúas teses de doutoramento de temática micolóxica.[1]

O seu labor micolóxico queda de relevo tendo en conta de que o catálogo de cogomelos de Galicia incluía seiscentas especies até a irrupción de Luís Freire; hoxe conta cunhas dúas mil, despois de que el mesmo elevase o seu número en varios centos, incluído o achado para a ciencia de tres novas especies:[2] Amanita porrinensis L. Freire & M . L. Castro ex M. L. Castro,[3] Gyroporus ammophilus M. L. Castro & L. Freire,[4] e Psathyrella ascarioides L. Freire & J. M. Losa.[5] [6]

Foi membro fundador da Sociedade Galega de Historia Natural —que presidiu desde 1980 a 1986—, do Grupo Botánico Galego, do Grupo Micolóxico Galego e da Asociación de Amigos da Casa das Ciencias.[1] [7]

Ten unha rúa dedicada co seu nome na Coruña, situada na urbanización Breogán. A petición foi feita pola súa familia e avalada sendo alcalde Javier Losada.

Desde 1999 os Museos Científicos Coruñeses, en colaboración coa Asociación de Amigos da Casa das Ciencias, organizan o Premio Luis Freire de Investigación Científica para Escolares. Este certame ten como obxectivo promover entre os estudantes galegos valores como a creatividade e a imaxinación científicas, a constancia ou o espírito crítico.[1]

Abreviatura[editar | editar a fonte]

A abreviatura L. Freire emprégase para recoñecer a Luis Freire como autoridade na descrición e taxonomía en botánica (en sentido amplo).

Notas[editar | editar a fonte]

  1. 1,0 1,1 1,2 1,3 Biografía en Museos Científicos Coruñeses.
  2. 2,0 2,1 "Luis Freire, los «boletus», la sabiduría". Artigo de Alfonso Andrade en La Voz de Galicia, 29-10-2016.
  3. Castro 2000, p. 101.
  4. Castro 2000, p. 189.
  5. Psathyrella ascarioides L. Freire & J. M. Losa 1977, in Boletín de la Real Sociedad Española de Historia Natural 75: 9.
  6. Psathyrella ascarioides en Mushroom Observer, Inc.
  7. Homenaje a Luís Freire, uno de los grandes micólogos de Galicia, en Hifas da Terra.

Véxase tamén[editar | editar a fonte]

Bibliografía[editar | editar a fonte]

Ligazóns externas[editar | editar a fonte]