LED

Un LED, acrónimo de light-emitting diode (en galego, díodo emisor de luz), é un tipo de díodo que ao ser polarizado en directa (é dicir, co polo negativo conectado á zona dopada tipo n) emite unha radiación luminosa. Este tipo de luces son ecolóxicas, cunha duración entre 30000 e 100000 horas.

Principio de funcionamento

O funcionamento dun LED baséase no fenómeno cuántico de emisión espontánea de luz que se dá en determinados materiais semicondutores baixo certas condicións. Este fenómeno consiste na perda de enerxía instantánea dun electrón nun semicondutor, pasando o electrón a un nivel enerxético menor, e resultando na emisión dun fotón, cunha enerxía (e as correspondentes frecuencia e longura de onda) igual á enerxía de excitación do electrón. Así, nos LED's máis típicos, formados por materiais cun único estado excitado colaborando na emisión de fotóns, a luz emitida é monocromática. Por outra banda, segundo o material co que estean fabricados, terán unha cor ou outra, entendendo por cor física a longura de onda que incluiría ademais das visíbeis as infravermellas.

Características

O LED é un dispositivo moi duradeiro en comparanza con outras fontes luminosas coma a lámpada incadescente ou o tubo fluorescente, ademais de presentar un formato moito máis sólido e compacto.

Presenta perdas térmicas moi pequenas en comparanza coa lámpada. O seu principio de funcionamento faino moito máis eficiente na conversión de potencia eléctrica a potencia luminosa.

Presenta un diagrama de emisión lambertiano, isto é, proporcional ao coseno do ángulo coa perpendicular á superficie de emisión. Isto dálle unha direccionalidade da luz emitida só superada polo láser, que facilita enormemente as operacións de enfoque da luz.

E por suposto, como se adiantou, ofrece a posibilidade de emisión monocromática, sen necesidade de filtros nin a perda de enerxía asociada a eles.

Véxase tamén

Outros artigos