Itzcoatl

Itzcoatl
	;
Biografía
Nacemento	1380 (Gregoriano) ; Tenochtitlán
Morte	1440 (59/60 anos); Tenochtitlán
Tlatoani de Tenochtitlán
	1427 – 1440 ; ← Xihuitl Temoc (en) – Moctezuma I (pt) →
Familia
Cónxuxe	Huacaltzintli
Fillos	Tezozomoc (en)
Pais	Acamapichtli (pt) e Tepanecas (pt)
Irmáns	Huitzilihuitl II

Itzcoatl (náhuatl clásico: Itzcōhuātl; lit. "Serpe de obsidiana"), nado no 1380 e finado no 1440, foi o cuarto rei de Tenochtitlán e fundador do imperio azteca, que gobernou entre 1427 e 1440. Baixo o seu liderado, o pobo mexica de Tenochtitlán desfíxose do dominio dos tepanecas, establecendo a Tripla Alianza Azteca xunto coas cidades-estado de Texcoco e Tlacopan.

Traxectoria[editar | editar a fonte]

Itzcoatl era fillo do tlatoani Acamapichtli e dunha muller tepaneca de Azcapotzalco, de nome descoñecido.^[1] Foi elixido rei ao ser asasinado o seu predecesor, o seu sobriño Chimalpopoca, a mans do tepaneca Maxtla, do altepetl de Azcapotzalco. Itzcoal logrou derrotar a Maxtla e rematar co dominio tepaneca sobre o centro de México grazas á súa alianza con Nezahualcóyotl de Texcoco. Tras a súa vitoria, Itzcoatl, Nezahualcóyotl e mais Totoquilhuaztli, rei de Tlacopan, fundaron a chamada Tripla Alianza Azteca, que constituíu a base do futuro imperio azteca.

Posteriormente, dirixiu a súa atención cara a orela sur dos lagos Xochimilco e Chalco. As fontes de auga doce desta rexión permitiran o desenvolvemento de grandes xardíns elevados, coñecidos como chinampas, sobre o leito dos lagos. As triunfantes campañas contra Xochimilco (1430), Mixquic (1432), Cuitlahuac (1433) e Tezompa aseguraron os recursos agrícolas necesarios para abastecer Tenochtitlán. Este feito, xunto coa conquista de Colhuacan e Coyoacán, cimentaron o poder da Tripla Alianza sobre o sur do val de México. En consecuencia, Itzcoatl nomeouse Culhua teuctli ("señor dos Culhua"), namentres Totoquilhuaztli tomou o título de Tepaneca teuctli ou señor dos Tepanecas.

Segundo o Códice Florentino, Itzcoatl ordenou a queima de tódolos códices históricos porque "non é boa idea que todo o mundo poida coñecer as pinturas".^[2] Isto permitiulle asentar unha versión estatal da historia e dos mitos, centrada na figura do deus Huitzilopochtli. Por outra banda, seguiu coa construción de infraestruturas en Tenochtitlán, como templos ou estradas. Así mesmo, estableceu unha xerarquía relixiosa e gobernamental que sería continuada polo seu sobriño e sucesor, Moctezuma I, tras o seu pasamento no 1440.