Iriadona
| Iriadona | |
|---|---|
| Orixe | Pontedeume, Galicia  |
| Período | 1991-2011 |
| Xénero(s) | Folk galego |
| Membros | Lidia Sanmartín, Miguel Ezquerro, Tino Casás, Manu Moares, Nando Vila |
| Antigos membros | Xosé Dobarro, Xoán Cabalar, Tito Placer |
| Na rede | |
| Iriadona en Google Sites | |
Iriadona foi un grupo musical eumés cuxa música se encadraba no folk. A súa traxectoria abarca un período de vinte anos (1991-2011) cunha ampla paréntese intermedia na que algúns dos membros fundadores participaron noutros proxectos musicais.
Fundación e primeira etapa[editar | editar a fonte]
O grupo foi fundado en 1991 por Miguel Ezquerro, Xosé Dobarro, Xoán Cabalar, Tito Placer, Tino Casás, Nando Vila e Manu Moares.
Xa no seu primeiro ano de existencia, participou en Vilagarcía na final galega do III Certame de Música Folk[1]. En 1993 gañou en Sanxenxo o segundo concurso Pelegrín, Xacobeo 93, organizado pola Xunta de Galicia. Un dos premios dese concurso foi a gravación dun CD, que saíu á rúa no ano 1994[2] con dez temas propios e tradicionais, levando por título o mesmo do grupo.
Nese mesmo ano, o director e produtor cinematográfico galego Ismael González Díaz escoitounos nunha das súas actuacións e púxose en contacto con eles para participaren na súa próxima película 'O' de Amor, na que actuou como protagonista a actriz Mónica Pont. O seu rol na película é deles mesmos, e saen en varias escenas tocando a súa música[3].
Durante estes anos actuaron por toda Galicia e compartiron escenario con músicos da relevancia de Luar na Lubre, Os Cempés, Xosé Manuel Budiño, Susana Seivane, Pat Kilbride ou Söig Siberil.
Paréntese[editar | editar a fonte]
Pouco despois de actuaren no filme de Ismael González, as ocupacións laborais da maioría deles e unha certa desmotivación dalgúns para continuaren fixeron que o grupo cesase nas súas actividades.
Algúns dos compoñentes continúan ligados á música. Tres deles -Dobarro, Nando e Manu- xunto con outras tres persoas, formaron na segunda metade dos noventa o grupo folk Atahíde[4], continuador en certa maneira de Iriadona. Chegaron a gravar unha maqueta e participaron nun CD dobre colectivo chamado Musiceum, feito enteiramente coa participación de músicos e grupos eumeses[5]. Neste mesmo CD participou outro grupo eumés, Trevinka, composto por tres membros de Iriadona -Tino, Nando e Manu- aos que se lles uniu o guitarrista Jose Esteban.
Reaparición e final[editar | editar a fonte]
Na segunda metade da primeira década do século XXI, os catro membros que formaran Atahíde, xunto coa vocalista fenesa Lidia Sanmartín, retomaron o nome de Iriadona e comezaron a ensaiar de cara á gravación dun novo disco. Aínda que é de destacar a actuación durante dous anos consecutivos na localidade inglesa de Faversham[6], as actuacións nesta etapa non foron moi numerosas pois, segundo declararon, a súa intención era gozar coa música sen maiores pretensións. Foi por iso polo que a gravación do CD se demorou durante uns anos ata que, finalmente, saíu á rúa no 2010 co nome de Imos indo, con oito cancións tradicionais e tres propias[7]. Neste traballo notábase a madureza alcanzada polo grupo, e todo parecía indicar que era o comezo dunha nova etapa chea de bo facer.
Porén, o disco supuxo o comezo da fin do grupo. Quizais o feito de levar tantos anos xuntos fixo que buscasen outros proxectos musicais. Así, algúns deles uníronse a outros músicos locais para faceren música infantil, dándolle o nome de Palitroque ao novo proxecto.
Discografía[editar | editar a fonte]
Notas[editar | editar a fonte]
Véxase tamén[editar | editar a fonte]
Ligazóns externas[editar | editar a fonte]
- Páxina do grupo en Google Sites Arquivado 22 de setembro de 2016 en Wayback Machine.