Estigma social da obesidade

Representación do estigma social da obesidade nun anuncio publicitario brasileiro de 1942.

O estigma social da obesidade ou gordofobia é unha opresión estrutural que provoca rexeitamento, prexuízos e discriminación cara ás persoas gordas. É consecuencia da mitificación dos corpos delgados, así como dos discursos que estigmatizan os corpos gordos. A gordofobia presume que todas as persoas poden controlar o peso e culpa ás persoas gordas dos seus corpos.

A biomedicina moderna contribúe á estigma social ao considerar os corpos cun índice de masa corporal superior a 25 como desviados ou doentes e que necesitan acción externa. A gordofobia exércese culturalmente a través de estereotipos que vinculan ás persoas gordas coa preguiza, a sucidade e o desleixo, tamén coa indesexabilidade dos corpos gordos. A discriminación social e institucional exclúe dereitos como a saúde e o traballo, e xera acoso, agresións e exclusión das relacións afectivas sexuais.

Dende os anos 90 estabelecéronse escalas e modelos de enquisas para comparar e determinar estereotipos negativos e actitudes de prexuízo entre os distintos grupos obxecto de estudo. A gordofobia estivo relacionada co prexuízo racial e a discriminación de xénero.