Pneumocito
Os pneumocitos[1] ou células alveolares son células que se encontran no epitelio dos alvéolos e nos septos entre os alvéolos. Os pneumocitos facilitan o intercambio respiratorio de gases entre o aire alveolar e o sangue dos capilares sanguíneos que rodean o alvéolo, contribúen ao mantemento e autorrexeneración do alvéolo e á secreción do surfactante pulmonar. Hai dous tipos de pneumocitos, chamados tipo I e tipo II.
Pneumocito tipo I[editar | editar a fonte]
Os pneumocitos tipo I ou células alveolares tipo I son células planas, que cobren unha área extensa, e teñen pouco grosor (0,2 μm; máis grosas na zona do núcleo). A súa superficie libre é xeralmente lisa e están unidas unhas a outras por medio de unións herméticas. Son as responsables do intercambio respiratorio de gases nos alvéolos e cobren a maior parte da superficie alveolar (>95%). Son a metade de numerosos cós pneumocitos tipo II, pero como estes últimos son moito máis pequenos e cobren 50 veces menos superficie da luz alveolar, os de tipo I cobren a maior parte da superficie do alvéolo.
Os pneumocitos tipo I non se poden dividir mitoticamente. Poden ser danados por substancias tóxicas do aire. En caso de danos pulmonares, poden orixinarse pneumocitos tipo I a partir da diferenciación de pneumocitos tipo II.
Pneumocito tipo II[editar | editar a fonte]
Os pneumocitos tipo II, tamén chamados células alveolares tipo II, células alveolares grandes ou pneumocitos granulares son células cuboidais ou arredondadas, pequenas e granulares. A súa superficie libre ten un pequeno número de microvilli. A súa superficie basal arredondada sobresae no tecido conxuntivo dos tabiques alveolares. Atópanse tipicamente nos puntos onde se unen os tabiques alveolares. Aínda que en número de células supoñen o 60 % das células que revisten o alvéolo, só cobren o 5 % da superficie do alvéolo, debido ao seu tamaño e forma.[2] Os pneumocitos tipo II son células secretoras, polo que presentan uns gránulos secretores que conteñen os precursores do surfactante cun contido en fosfolípidos entre 3 e 6 veces maior ca en proteína. Os gránulos mostran unha subestrutura laminar moi característica, polo que se chaman corpos lamelares. Descargan o seu contido por exocitose e o surfactante liberado esténdese formando unha capa monomolecular sobre a superficie do alvéolo [3].
Desenvolvemento[editar | editar a fonte]
Os pneumocitos tipo II empezan a formarse na 24ª semana de xestación, e empezan a segregar unha pequena cantidade de surfactante. Porén, as cantidades de surfactante segregadas non son as suficientes para unha adecuada función pulmonar ata a 35ª semana de xestación, e esta é a razón principal pola que aumentan moito os casos de síndrome de distrés respiratorio en nenos nacidos antes da 35ª semana de xestación.
Funcións[editar | editar a fonte]
Os pneumocitos de tipo II son responsables da produción e secreción de surfactante pulmonar, unha substancia tensoactiva, que facilita a difusión dos gases ao reducir a tensión superficial alveolar (a maioría do cal é o fosfolípido dipalmitoilfosfatidilcolina). Os fosfolípidos surfactantes almacénanse nos pneumocitos tipo II nos gránulos chamados corpos lamelares, que son vesículas especializadas. A liberación do surfactante dos corpos lamelares ocorre desde as primeiras respiracións do recentemente nado en adiante.
Os pneumocitos tipo II poden dividirse por mitose nos alvéolos e substituír os pneumocitos tipo I danados.
O xene humano MUC1, asociado cos pneumocitos tipo II, foi identificado como un marcador do cáncer de pulmón.[4]
Notas[editar | editar a fonte]
- ↑ "Vocabulario de medicina" (PDF). Universidade de Santiago. Consultado o 13 de setembro de 2016.
- ↑ "Histology, A Text and Atlas, Sixth Edition," 2011, by Ross, Michael H, and Pawlina, Wojciech
- ↑ D. W. Fawcett. Tratado de Histología. Editorial Interamericana-Mc. Graw Hill. 11ª edición. Páxinas 746-751. ISBN 84-7605-361-4
- ↑ Jarrard JA, Linnoila RI, Lee H, Steinberg SM, Witschi H, Szabo E (1998). "MUC1 is a novel marker for the type II pneumocyte lineage during lung carcinogenesis". Cancer Res. 58 (23): 5582–9. PMID 9850098.
Véxase tamén[editar | editar a fonte]
Outros artigos[editar | editar a fonte]
Ligazóns externas[editar | editar a fonte]
- KansasHistology - resp|resp17 [1]Arquivado 05 de febreiro de 2012 en Wayback Machine.
- BUHistology - 13905loa [2]
- Electron micrograph at luc.edu
