David Mackenzie
| David Mackenzie | |
|---|---|
| Nacemento | 8 de setembro de 1943 |
| Lugar de nacemento | Nottinghamshire |
| Falecemento | 26 de febreiro de 2016 |
| Lugar de falecemento | Santiago de Compostela |
| Nacionalidade | Reino Unido |
| Alma máter | Universidade de Oxford |
| Ocupación | medievalista |
| [ editar datos en Wikidata ] | |
David Mackenzie, nado en Sutton-in-Ashfield (Nottinghamshire) o 8 de setembro de 1943 e finado en Santiago de Compostela o 26 de febreiro de 2016,[1] foi un galicianista e medievalista inglés.
Traxectoria[editar | editar a fonte]
Licenciouse en Linguas modernas, na especialidade de lingua española pola Universidade de Oxford en 1966, e progresou os seus estudos nela até completar un mestrado. En 1975 doutorouse pola Universidade de Nottingham cunha tese de análise sobre a Crónica de Santa María de Iria, onde comezou a súa relación con Galicia. Despois de traballar para a Biblioteca Británica foi profesor de Estudos hispánicos inicialmente na Universidade do Úlster (1974), e logo da Universidade de Birmingham (1986), onde ao longo dunha década foi progresando de profesor titular a catedrático.
En Birmingham creou o primeiro Centro de Estudos Galegos nunha universidade británica, desde onde desenvolveu un obradoiro de tradución de literatura galega ao inglés que deu ao prelo, entre outras, a primeira tradución de Méndez Ferrín ou de Castelao a esa lingua. Ao de Birmingham seguíronlle outros centros de estudos galegos noutras partes do Reino Unido e do mundo. Foi un dos impulsores da Asociación Internacional de Estudos Galegos.
En 1997 mudou o seu centro de traballo para a Universidade de Cork, onde tamén estableceu un centro de estudos galegos. Nesta universidade irlandesa xubilouse en 2008, aínda que continuou dando clase de estudos hispánicos na Universidade de Wisconsin-Milwaukee ata 2011. Logo da súa xubilación estableceuse de forma permanente en Santiago de Compostela onde finou. En 2015 reuniuse un volume de estudo de diversos especialistas en lingua e literatura galega, na súa homenaxe (En memoria de tanto miragre).
Foi membro correspondente da Real Academia Galega.
Galardóns[editar | editar a fonte]
- Pedrón de Ouro en 1994
- Hispanic Achivement Award, no London Hispanic Festival de 1994[2]
- Premio da Cultura Galega en 2014
- Membro de honra da Asociación Internacional de Estudos Galegos
Notas[editar | editar a fonte]
- ↑ "Morre o galicianista británico David Mackenzie". Sermos Galiza. 26 de febreiro de 2016. Arquivado dende o orixinal o 28 de febreiro de 2016. Consultado o 26 de febreiro de 2016.
- ↑ Muere en Santiago el británico David Mackenzie, primer catedrático extranjero de estudios gallegos, nova en La Voz de Galicia o 26 de febreiro de 2016. (en castelán)
Véxase tamén[editar | editar a fonte]
Ligazóns externas[editar | editar a fonte]
- Ficha de Mackenzie na Universidade de Cork. (en inglés)
