Albertosaurus

Albertosaurus Rango fósil: Cretáceo tardío
Esqueleto en Woodland Park, Colorado.
Clasificación científica
Reino: Animalia Filo: Chordata Clase: Sauropsida Subclase: Diapsida Superorde: Dinosauria Orde: Saurischia Suborde: Theropoda Infraorde: Coelurosauria Superfamilia: Tyrannosauroidea Familia: Tyrannosauridae Subfamilia: Albertosaurinae Xénero: Albertosaurus Osborn, 1905 Especie: sarcophagus
Especie
Albertosaurus sarcophagus Osborn, 1905 tipo
Sinonimia
Deinodon sarcophagus (Osborn, 1905) Albertosaurus arctunguis Parks, 1928 Deinodon arctunguis (Parks, 1928)

Albertosaurus (que quere dicir "lagarto de Alberta") é un xénero de dinosauro terápodo que viviu en Norte América occidental durante o período Cretáceo tardío, hai 70 millóns de anos. A especie tipo, A. sarcophagus, estaba aparentemente restrinxida ó que hoxe se coñece como a provincia canadense de Alberta, razón pola cal leva o seu nome. Os científicos non concordan co contido do xénero, recoñecendo algúns deles o Gorgosaurus libratus como unha segunda especie.

Como membro da familia Tyrannosauroidea, Albertosaurus era un depredador bípede con dúas pequenas mans e unha testa masiva con ducias de dentes longos e afiados. É posible que estivese no máis alto da súa cadea trófica no seu ecosistema. Mentres que o Albertosaurus era grande para ser un terápodo, era moito máis pequeno que o famoso Tyrannosaurus rex, medindo entre nove e dez metros de longo e pesando algo menos de 2 toneladas.

Dende a primeira descuberta en 1884, recuperáronse máis de 30 exemplares fósiles, o cal achegou ós científicos un coñecemento máis polo miúdo da anatomía do Albertosaurus en comparanza con outros tiranosáuridos. O descubrimento de 26 individuos nun único lugar achega evidencias dun comportamento de caza en manda e permitiu estudos de ontoxenia e poboación biolóxica, os cales son imposibles en dinosauros menos coñecidos.

Descrición

Comparación do tamaño cun humano.

Albertosaurus era máis cativo ca outros tiranosáuridos, como o Tarbosaurus ou o Tyrannosaurus. Polo xeral, os adultos de Albertosaurus roldaban os 9 metros de longo, mentres que individuos de máis idade podían chegar a medir até 10 metros de longo. Varias estimacións de masa independentes, obtidas a través de diferentes métodos, suxiren que un Albertosaurus adulto podía pesar entre 1,3 toneladas e 1,7 toneladas.

Albertosaurus compartía unha aparencia de corpo semellante a tódolos demais tiranosáuridos. Como terápodo, Albertosaurus era bípede e equilibrada a súa pesada testa e o seu torso cunha longa cola. Porén, as extremidades anteriores dos tiranosáuridos eran extremadamente pequenas en relación ó tamaño do seu corpo e só tiñan dous díxitos. As súas extremidades posteriores eran longas e remataban en pés con catro dedas, das cales o primeiro díxito, chamado hallux, era curto e non chegaba a tocar o chan. O terceiro díxito era o máis longo de todos. Albertosaurus podía alcanzar velocidades de 14−21 km/hour. É posible que os individuos máis novos puidesen alcanzar maiores velocidades.

Coñécense dúas impresións da pel de Albertosaurus, ámbalas dúas amosando escamas. Unha das mostras foi descuberta con algunhas costelas gástricos e a impresión dun óso longo e descoñecido, o que indica que a mostra é do ventre. As escamas son pequenas e medran gradualmente tomando unha forma hexagonal. Tamén se conservan dúas escamas de características máis grandes, colocadas a unha distancia de 4,5 cm. Outra impresión de pel procede dunha parte descoñecida do corpo. As escamas son pequenas, con forma de diamante e dispostas en fila.