Pleura (anatomía)

Para outras páxinas con títulos homónimos véxase: Pleura.

Vista anterior dun tórax humano. A pleura, en azul, e os pulmóns, en violeta.

A pleura, en anatomía, é cada unha das dúas membranas serosas (dereita e esquerda), de orixe mesodérmica, que recobren ambos os pulmóns, o mediastino, o diafragma e a parte interna da caixa torácica.

O adxectivo relacionado coa pleura é pleural.

As pleuras

• A pleura parietal é a parte externa da pleura, en contacto coa caixa torácica, o mediastino e a cara superior do diafragma.
  • A pleura cervical é a porción superior da pleura parietal, que asoma na raíz do colo.
  • A pleura mediastínica é a porción seguinte da pleura parietal, que cobre o lado do pulmón correspondente ao mediastino.
  • A pleura pericárdica é a parte da pleura mediastínica que cobre ou se fusiona co pericardio.
• A pleura visceral é a parte interna da pleura, que está en contacto cos pulmóns.

Cavidade pleural e líquido pleural

Ambas as pleuras únense a nivel do hilio formando unha cavidade virtual, a cavidade pleural, que contén normalmente unha pequena cantidade de serosidade, denominada líquido pleural. O volume normal de líquido pleural contido nesta cavidade é de 0,1 a 0,2 ml/kg de peso corporal. Este líquido facilita os movementos de escorregamento indispensábeis para a respiración.

Composición e pH normal do líquido pleural
Volume	0,17 ± 0,162 ml/kg
Células Mesoteliais Macrófagos Linfocitos C4/C8	1 000-5 000 0-2 % 64-80 % 18-36 % 0,5-1 %
Proteínas	1-2 g/dl
LDH	<50 % do valor do plasma
pH	7,37-7,45

O movemento do líquido entre as follas parietal e visceral está determinado pola ecuación de Starling do transporte de líquidos e pola drenaxe linfática, o que permite a entrada e a saída de líquido e proteínas en forma balanceada para manter un volume e unha concentración constante de proteínas.

Principais enfermidades da pleura

• Pneumotórax: presenza de aire na cavidade pleural.
• Derramamento pleural: presenza de líquidos na cavidade pleural.
• Empiema pleural: presenza de pus na cavidade pleural.
• Hemotórax: presenza de sangue na cavidade pleural.
• Hemopneumotórax: presenza de sangue e aire na cavidade pleural.
• Quilotórax: presenza de líquido linfático na cavidade pleural.

Galería de imaxes

• 
  Posición e relacións do esófago na rexión cervical e co mediastino posterior. Visto por detrás.
• 
  Sección transversal do tórax, mostrando o mediastino medio e o posterior. As cavidades pleural e pericárdica están exaxeradas, xa que normalmente non hai ningún espazo entre a pleura parietal e a visceral, e entre o pericardio e o corazón.
• 
  Detalle dun pulmón mostrando as pleuras.
• 
  Sección do tórax, mostrando a situación da pleura

Véxase tamén

Bibliografía

• Light, Richard W. (2007). Pleural Diseases. Lippincott Williams & Wilkins. ISBN 978-0781769570. 

Outros artigos

• Aparato respiratorio
• Pneumoloxía
• Pleurite

Ligazóns externas

• Patoloxía pleural en Uninet (en castelán).
• The Pleura Arquivado 15 de marzo de 2017 en Wayback Machine. en The Anatomy Lesson, por Wesley Norman (Georgetown University) (en inglés).
• parietal pleuraArquivado 02 de decembro de 2016 en Wayback Machine. en GPnotebook (en inglés).