Cancro de tiroide

Na Galipedia, a Wikipedia en galego.

O cancro de tiroide é unha enfermidade tumoral que afecta ao tiroide. Abrangue tanto os tumores derivados do tecido tiroideo coma tumores alleos que asentan sobre esta glándula.

Causas[editar | editar a fonte]

Ao igual que outros tumores, existen unha serie de factores de risco que predispoñen a padecer cancro de tiroide. En particular, a radiación na área cervical eleva o risco de padecer este tipo de enfermidade. Tras o accidente de Chernóbil observouse unha maior incidencia deste tumor [1]. Nos individuos que recibiron radioterapia nesta área, tamén hai un maior risco de cancro.

Signos e síntomas[editar | editar a fonte]

Coma no resto de tumores, os primeiros estadíos da enfermidade poden pasar desapercibidos. Cando o tumor crece pode abultar no pescozo, sendo palpable. Noutros casos comeza a producir síntomas de hipertiroidismo, por hiperfunción da glándula. Cando o tumor xa está avanzado pode manifestarse coma unha metástase nun ganglio linfático ou noutro órgano.

Nalgúns casos pouco frecuentes, parte do tecido tiroideo queda fóra do seu sitio, puidendo desenvolver unha neoplasia en lugares pouco habituais.

Cancro primario[editar | editar a fonte]

O cancro primario de tiroide é unha neoplasia derivada das propias células do tiroide. Existen varios tipos de cancro primario:

Cancro papilar[editar | editar a fonte]

Artigo principal: Cancro papilar de tiroide.

O carcinoma papilar é a variedade máis frecuente de cancro de tiroide (supón aproximadamente o 70% dos casos). Histoloxicamente, distínguese por formar papilas. É o tumor tiroideo de maior supervivencia e mellor pronóstico. O seu tratamento consiste na extirpación cirúrxica. En casos nos que non se poda realizar, pódese empregar iodo 131, que destrúe o tecido tiroideo. Tras a cirurxía será preciso en moitos casos a administración de levotiroxina para substituír a función do tiroide perdido.

Cancro folicular[editar | editar a fonte]

Artigo principal: Cancro folicular de tiroide.

O cancro folicular é a segunda variedade máis frecuente de cancro primario de tiroide. Adoita metastatizar a ganglios linfáticos cervicais e ten unha supervivencia inferior ao papilar. A diferenza con este, non pode ser diagnosticado mediante punción-aspiración con agulla fina, senón que se precisa unha biopsia.

Cancro medular[editar | editar a fonte]

Artigo principal: Cancro medular de tiroide.

O cancro medular é unha variedade máis infrecuente de cancro tiroideo, pero de peor prognóstico. A diferenza dos demais, pode producir calcitonina, polo que esta substancia convértese nun marcador diagnóstico e de seguimento. Na mostra anatómica, obsérvase acumulación de amiloide. Un 10-15% están asociados a una enfermidade xenética denominada MEN-2, que produce un elevado risco desta e outras neoplasias coma feocromocitomas.

Nos casos nos que metastatiza, adoita facelo a órganos a distancia. Non obstante, non adoitan supor unha grande merma no prognóstico vital.

Notas[editar | editar a fonte]