Vilaia

Na Galipedia, a Wikipedia en galego.

Unha vilaia ou vilaiete (en árabe ولاية wilaya; en turco e persa, vilayet; en húngaro: vilájet) é unha subdivisión administrativa dalgúns países musulmáns.

Uso moderno[editar | editar a fonte]

Dependendo do país, pode ser traducido como "provincia", "prefectura", "estado" e outros.

  • Afganistán: componse de 24 provincias;
  • Alxeria: divídese en 48 provincias;
  • Marrocos: divídese en 16 rexións gobernadas por un vali, as cales se subdividen en vilaias, sendo entidades de segundo nivel;
  • Malaisia: divídese en 13 negeri (estados) e 3 wilayah persekutuan (territorios federais);
  • Mauritania: componse de 13 vilaietes (por veces chamados rexións), subdivididos en 53 moughataa;
  • Omán: divídese en 4 mohafazat e 5 mintaqah, estas últimas subdivididas en vilaietes (por veces chamados distritos);
  • Quenia: componse de 8 provincias subdivididas en vilaietes (ás veces chamados distritos);
  • Usbequistán: divídense en viloyatlar (singular: viloyat);
  • Sudán: componse de 26 vilaietes (por veces chamados estados);
  • Tanzania: as 26 rexións do estado, chamadas mkoa en suahili, divídense en distritos, wilaya en suahili.
  • Taxiquistán: divídese en viloyatho (singular: viloyat);
  • Tunisia: componse de 24 vilaietes (ولاية wilāyah), chamados gouvernorats en francés;
  • Turcomenistán: divídese en welayat.

Uso histórico[editar | editar a fonte]

A pronunciación turca da palabra (orixinalmente árabe) vilayet, era o nome das provincias do Imperio Otomán. No Imperio Otomán, unha reforma administrativa de 1864 dividiu o territorio en vilaietes.

Entre 1541 e 1686 existiu a vilaia Buda na Hungría conquistada polos turcos otomanos, a cal era a principal despois das outras vilaias húngaras de Temesvár (1552), Eger (1596), Nagykanizsa (1600), Várad (1660) e Érsekújvár (1663). Logo de ser reconquistado polos Habsburgo, volveuse a unificar o reino de Hungría, e as vilaias deixaron de existir.

Outros usos[editar | editar a fonte]

Os campos de refuxiados saharauis de Tinduf atópanse divididos en catro asentamentos, denominados wilayas, cada un dos cales está composto de varias dairas.

En hindi e urdu, o termo Vilayet é usado para referirse a calquera país estranxeiro.

En árabe, o termo ولاية wilāyah é usado para referirse os estados dos EUA, e todo o país é designado الولايات المتحدة (al wilāyat al mutahidah).