Tornado Alley

Na Galipedia, a Wikipedia en galego.
Corazón da Tornado Alley

Tornado Alley (en galego diríamos: calella dos tornados) é unha expresión popular usada en EUA para designar un amplo territorio do país onde os grandes tornados son máis frecuentes. Esta zona estaría comprendida entre as Montañas Rochosas e os Montes Apalaches.

Definición[editar | editar a fonte]

O Servizo Meteorolóxico Nacional, dependente da NOAA, non ten ningunha definición do Tornado Alley, polo que non existe oficialidade ao respecto. Segundo o Laboratorio Nacional para as Tormentas Severas, a orixe e difusión do termo procedería dos medios de comunicación, os cales o utilizan sen ningún criterio científico para designar un grande territorio con límites pouco definidos onde son frecuentes fenómenos meteorolóxicos deste tipo.[1]

Delimitación xeográfica e temporal[editar | editar a fonte]

Localización do Tornado Alley (en rosa), coas diferentes masas de aire que interveñen na aparición de tornados: Azul, aire frío e seco; Laranxa, aire cálido e seco; Verde, aire cálido e húmido.

Aínda que non existe ningún estado totalmente a salvo de tornados, os rexistros meteorolóxicos conclúen que son moito máis habituais nas Grandes Chairas comprendidas entre as Rochosas e os Apalaches, e de maneira excepcional Florida. Texas é, estatisticamente, o estado con maior número de tornados e mortes causados por estes de toda a federación.[2]

Os estados con maior número de tornados de carácter forte (= a F3 na escala Fujita) son, de sur a norte, Texas, Oklahoma, Kansas, Nebraska, Iowa, Colorado, Wyoming e Dakota do Sur, estados que comprende a Tornado Alley.[3] Os estados máis orientais teñen tamén fortes tornados, pero a frecuencia é menor.[4]

Os tornados tamén existen con bastante frecuencia e intensidade noutros lugares, como o sur das provincias Canadienses de Ontario, Manitoba, Saskatchewan e Alberta. Outra zona considerada propicia para tornados en América do Norte, alén do extremo sur de Florida nos Estados Unidos de América, é a fronteira de Texas con México ao norte dos estados Mexicanos de Nuevo León, Coahuila e Tamaulipas.

A aparición de tornados está directamente relacionado co choque de masas de aire de distintas características. Estatisticamente, os tornados son máis frecuentes no Tornado Alley entre os meses de abril e setembro, o que se lle chama a temporada dos tornados.[3] Nestes meses, a influencia das masas cálidas orixinadas no Golfo de México é moito maior e profunda cara o norte. Durante o inverno os estados máis meridionais fican baixo o influxo destas masas de aire, rexistrando as taxas máis altas de tornados de todo o ano.[3]

Efectos na poboación[editar | editar a fonte]

Segundo o Centro Nacional de Predición de Tormentas, entre 1950 e 1997 producíronse 13.808 tornados no Tornado Alley. Estes causaron 1132 mortos e miles de millóns de dólares en danos materiais.[2][5] O tratamento mediático é notable na zona do Tornado Alley, cun seguimento detallado por parte das televisións locais sobre a previsión e evolución das tormentas que poden xerar tornados. Ademais, existe unha avanzada rede de alertas de tornados controlada polo Servizo Meteorolóxico Nacional, con sirenas nos municipios para alertar a poboación e refuxios especialmente deseñados para estas catástrofes.

No corazón da Tornado Alley as normas de construción son máis esixentes que noutros locais dos EUA, esixindo teitos reforzados e unións máis fortes entre a construción e os alicerces.

Actividade dos tornados nos Estados Unidos. As zonas máis escuras concordan coa Tornado Alley.

Notas[editar | editar a fonte]

  1. "FREQUENTLY ASKED QUESTIONS. About Tornadoes..." (en inglés). National Severe Storms Laboratory. http://www.nssl.noaa.gov/faq/faq_tor.php. Consultado o 17 de febreiro de 2011. 
  2. 2,0 2,1 "Southeast tornadoes are nation's deadliest" (en inglés). USA Today. 20 de maio de 2005. http://www.usatoday.com/weather/tornado/wtordead.htm. Consultado o 17 de febreiro de 2011. 
  3. 3,0 3,1 3,2 "U.S. Tornado Climatology" (en inglés). National Climatic Data Center. http://lwf.ncdc.noaa.gov/oa/climate/severeweather/tornadoes.html. Consultado o 17 de febreiro de 2011. 
  4. "F5 and EF5 Tornadoes of the United States (1950 - present)" (en inglés). NOAA. http://www.spc.noaa.gov/faq/tornado/f5torns.html. Consultado o 17 de febreiro de 2011. 
  5. O NCDC non ofrece exactamente datos sobre o Tornado Alley, a cifra é un sumatorio dos tornados e vítimas nos estados de Texas, Oklahoma, Kansas, Nebraska e Missouri.

Véxase tamén[editar | editar a fonte]

Ligazóns externas[editar | editar a fonte]