Steve Lukather

Steve Lukather
Nome completo	Steven Lee Lukather
Data nacemento	21 de outubro de 1957 (65 anos)
Nado en	Os Ánxeles
Cónxuxe	Shawn Batten
Ocupación	Músico, compositor, produtor
Xénero	hard rock, Pop rock, Jazz fusion
Instrumento(s)	Guitarra, voz
Relacionado con	Toto, Ringo Starr & His All-Starr Band, Los Lobotomys, Larry Carlton
Tempo en activo	1975-presente
Na rede
	http://www.stevelukather.net/
	[ editar datos en Wikidata ]

Steven Lee "Luke" Lukather, nado o 21 de outubro de 1957 nos Ánxeles^[1] (California), é un guitarrista, cantante, compositor e produtor americano, coñecido polo seu traballo na banda americana Toto. Lukather gravou partes de guitarra para máis de 1500 álbums, para unha gran cantidade de artistas e xéneros diferentes. Contribuíu tamén en álbums como compositor ou produtor. Lukather editou seis álbums en solitario, e está a traballar no sétimo.

En 1976, cando Lukather tiña 19 anos, foi invitado polos seus compañeiros de instituto David Paich e os irmáns Porcaro, Steve e Jeff, a formar parte da súa banda, Toto. Foi membro da banda ata a súa separación no ano 2008, e segue involucrado nas xiras que fan periodicamente. Foi nomeado a doce Premios Grammy, e gañou cinco. Mentres que o seu traballo con Toto baseábase principalmente no pop rock e o seu traballo en solitario no rock progresivo e no hard rock, moitos dos traballos á parte de Lukather céntranse no jazz fusion. Colaborou durante moito tempo co guitarrista de jazz Larry Carlton, e foi membro da banda de jazz fusion Los Lobotomys.

Influenciado por guitarristas de blues rock coma Jimi Hendrix ou Jimmy Page, e outros de jazz fusion coma Al Di Meola e Frank Gambale, Lukather é coñecido polo seu estilo "melódico e intenso". É tamén recoñecido pola súa eficiencia no estudio, xa que pasou de usar moitos efectos de guitarra no estudio e usar o mínimo de efectos no proceso do son.