Robert Kalina

Robert Kalina

Biografía
Nacemento	29 de xuño de 1955 (68 anos) Viena, Austria
Datos persoais
País de nacionalidade	Austria
Actividade
Ocupación	deseñador , deseñador gráfico
Premios  Honour in Gold for Services to the Republic of Austria (en)  Berufstitel Professor (en)

Robert Kalina, nado en Viena o 29 de xuño de 1955, é un deseñador gráfico austríaco, vinculado ao Banco Nacional de Austria.

Traxectoria

Robert Kalina graduouse en 1975 no Instituto Superior de Deseño Gráfico e Investigación e só un ano despois pasou a formar parte do cadro de persoal do banco nacional do seu país, onde comezou a súa carreira de deseñador de billetes cos seus proxectos para as emisións en xilins do seu país en 1982. A partir dese ano foi o autor dos deseños de todos os billetes emitidos por Austria ata 2002.

Como artista autor da proposta presentada pol Banco Nacional de Austria, resultou gañador en 1996 da competición para elixir o deseño da primeira serie dos billetes de euro que empezarían a circular o 1 de xaneiro de 2002. A elección do seu proxecto entre os 44 participantes produciuse no consello do Instituto Monetario Europeo do 3 de decembro de 1996. A súa proposta rompeu coa tradición de representar persoeiros de relevancia histórica e aplicou motivos vinculados á historia da construción europea a través de pontes, portas e fiestras en diferentes estilos arquitectónicos característicos de todo o continente, como metáfora do espírito de apertura, unión e cooperación da Unión Europea.

En 2013 realizouse un redeseño destes billetes, para o BCE escolleu un deseñador independente, o alemán Reinhold Gerstetter, que non variou a esencia dos deseños iniciais de Kalina.

A Kalina débenselle tamén os deseños doutros billetes de diversos países, como os acerbaixanos con valor facial en manats, a serie de Libia de 2010 con valor en libras, e o billete de 200 marcos convertibles da serie de 2002 de Bosnia e Hercegovina, cunha ponte no reverso que lembra os da serie de euros do mesmo ano.

En 2011, Kalina xubilouse como empregado do Banco Nacional de Austria.

Premios

• Cruz de Honra das Ciencias e as Artes de Austria (1ª clase).
• 2011: Medalla de Ouro polos Servizos Prestados á República de Austria.
• 2017: Premio do título de Berufstitels Professor.

Galería de deseños de Robert Kalina

Billetes de Acerbaixan en manats

• 
  Billete de 1 manat de 2005.
• 
  Billete de 5 manats de 2005.
• 
  Billete de 10 manats de 2005.
• 
  Billete de 20 manats de 2005.
• 
  Billete de 100 manat de 2005

Billetes en euros

• 
  Billete de 5 euros de 2002.
• 
  Billete de 10 euros de 2002.
• 
  Billete de 20 euros de 2002.
• 
  Billete de 50 euros de 2002.
• 
  Billete de 100 euros de 2002.
• 
  Billete de 200 euros de 2002.
• 
  Billete de 500 euros de 2002.

Véxase tamén

Outros artigos

• Billetes de euro
• Reinhold Gerstetter

Bibliografía

• ECB. Euro Banknote Design Exhibition. European Central Bank. 3ª ed. 2009. ISBN 978-92-899-0381-3

Ligazóns externas

• Entrevista a Robert Kalina en Süddeutsche Zeitung