Phoolan Devi

Phoolan Devi

Nome orixinal	(hi) फूलन देवी
Biografía
Nacemento	10 de agosto de 1963 Jalaun district, India (en)
Morte	25 de xullo de 2001 (37 anos) Nova Deli, India
Causa da morte	homicidio, ferida por arma de fogo
Member of the 13th Lok Sabha (en)
1999 – 25 de xullo de 2001 Lexislatura: 13th Lok Sabha (en) Circunscrición electoral: Mirzapur Lok Sabha constituency (en)
Member of the 11th Lok Sabha (en)
Circunscrición electoral: Mirzapur Lok Sabha constituency (en)
Datos persoais
País de nacionalidade	India
Actividade
Ocupación	política (1996–), bandoleira (–1983)
Partido político	Samajwadi Party (en)
Outro
Imputación	Bandidaxe e Secuestro

Phoolan Devi ou Phulan Devi, popularmente coñecida como a Raíña dos bandidos, nada o 10 de agosto de 1963 en Gorha Ka Purwa (Uttar Pradesh) e finada en Nova Deli o 25 de xullo de 2001, foi unha ladroa e política india. Era famosa en toda a India durante o seu tempo como bandida.

Traxectoria

Infancia e xuventude

Phoolan naceu na casta shudra, nunha familia do clan mallaah (barqueiros), na pequena aldea de Gorha ka Purwa no estado do Uttar Pradesh. Era a segunda filla dunha familia moi pobre de catro meniñas e un meniño. Foi casada con once anos a cambio dun pequeno dote e pasou a unha rutina de malleiras, sendo violentada e forzada a un arduo traballo no campo. Xa adolescente, pasou a ser asediada por mozos dun clan (jati) poderoso na rexión, pertencente á casta (varna) dos guerreiros ou nobres (kshatriya). Para fuxiren da acusación, acúsana de tentar seducilos, facendo que fose expulsada da aldea.

Bandoleirismo

Rexeitada tamén pola familia paterna, é abrigada por un parente próximo até o día en que a súa casa é invadida por un grupo de asaltantes que viñeron raptala. Presa nas montañas, algúns comezan a solidarizarse co seu sufrimento. O líder da banda é morto por un membro do grupo de nome Vikram, que se torna o protector de Phoolan. Ambos asumen a dianteira do grupo e comezan a atacar o comercio e as castas superiores. O imaxinario popular afirma que, nas súas accións, protexen mulleres e nenos e distribúen parte da ganancia. Tal pasaxe é contestada por algúns sectores, que ven na banda un grupo de asaltantes comúns. A súa sorte muda, novamente, co asasinato de Vikram, practicado por dous irmáns do clan Thakur, da casta Kshatriya. Alcanzando o control do grupo, os thakur préndena por tres semanas, período durante o cal foi violentada por todo o clan. A súa fuga ocorre por auxilio dos Mallah (canoeiros).

Phoolan retorna ás montañas. Gañando a protección e liderado do grupo Mallah, comeza a atacar o comercio da rexión. Pola súa acción, tida como violenta e xusta, Phoolan é cada vez máis asimilada pola poboación á deusa Devi, do hinduísmo, que restabelece o dharma a través dunha epifanía terrorífica, na cal dá cabo de exércitos de demos. Os ataques de Phoolan Devi culminan coa morte de 22 kshatriyas do grupo que a aprisionara, escapando só os seus líderes. Nese punto, a cuestión xa deixara de ser soamente criminal para tornarse política. Phoolan conta cun forte apoio popular, imprescindíbel para a reelección do goberno estatal. Por outro lado, o clan rival posúe aliados de entre os altos cargos internos do goberno. Presionado por ambos os lados, o goberno vese obrigado a negociar e non permitir a morte de Phoolan Devi pola policía, mais a buscar a súa rendición. Xa con moitas baixas no seu grupo e sen munición, Phoolan Devi entrega as armas mediante unha serie de exixencias, de entre as cales unha cerimonia convocada especialmente para tal. Son cedidas terras para a súa familia e ela non debería ser condenada á morte. Ela agarda xuízo en reclusión durante once anos, ao final dos cales son retiradas as acusacións e é liberada.

Vida política

En 1996, lánzase ao preito democrático polo Partido Samajwadi (socialista), sendo electa ao Parlamento indio. A súa plataforma política consistiu na defensa dos estratos inferiores da poboación india: os de casta baixa, os sen-casta, mulleres etc.

Tornouse símbolo de loita das clases máis baixas e a súa vida foi tema de polo menos catro libros e un filme.

Repercusión na Galiza

A obra A conquista da escola de Madhubai de Hélène Cixous que toma como base a vida de Phoolan Devi foi traducida ao galego por Puri Cabido e levada ao teatro polo Teatro do Atlántico.

Véxase tamén

Ligazóns externas

• "Phoolan Deri - A Rainha Bandido". Mulher Portuguesa. multibase.pt. Consultado o 2010-01-07. 
• "Bandit Queen (1994)". cinemaindiano.blogspot.com. 2009-08-08. Consultado o 2010-01-07.