Mae Jemison

Mae Jemison
Nome completo	Mae Carol Jemison
Nacemento	17 de outubro de 1956
Lugar de nacemento	Decatur
Nacionalidade	Estados Unidos de América
Etnia	Afroamericano
Alma máter	Universidade Stanford, Weill Cornell Medicine, Stanford University School of Engineering e Morgan Park High School
Ocupación	astronauta, médica, profesora, física, actriz, enxeñeira e escritora de literatura infantil
Premios	NASA Space Flight Medal, National Women's Hall of Fame, Medalha Elizabeth Blackwell, Texas Women's Hall of Fame, Rachel Carson Award e Fellow of the AAAS
Na rede
	http://www.drmae.com/
	[ editar datos en Wikidata ]
	v; c; e;

Mae Jemison, nada en Decatur (Alabama) o 17 de outubro de 1956, é unha enxeñeira química, médica e astronauta da NASA. Foi a primeira muller afroamericana en viaxar ao espazo.

Traxectoria[editar | editar a fonte]

Mae Jemison é a terceira filla de Charles e de Dorothy, moi interesados na súa educación. Dende moi nova tivo claro quería ser científica e xa antes de acudir á escola secundaria interesouse polo tema do espazo.^[1]^[2] Estudou na Universidade de Stanford cunha bolsa obtendo o graduado en Enxeñaría Química. Despois doutorouse en Medicina pola Universidade Cornell en 1981.^[3] Dende 1983 a 1985 uniuse ao Corpo de Paz servindo como médica castrense da área en África Occidental, especialmente en Serra Leona e Liberia.

O 4 de xuño de 1987, Mae Jemison converteuse na primeira muller afroamericana en ser admitida no programa de formación de astronautas da NASA, e en 1992 foi a primeira muller afroamericana en viaxar ao espazo.^[4] Viaxou a bordo do Endeavour na misión STS47, e durante os oito días que estivo no espazo, Mae Jemison realizou experimentos sobre a ingravidez e a cinetose na tripulación e nela mesma.^[5] Segundo detalla a NASA, antes de regresar a terra o equipo completou 44 experimentos conxuntos entre os Estados Unidos e o Xapón.^[6] En total estivo 190 horas no espazo. Despois de servir na NASA de 1987 a 1993, Jemison fundou o Jemison Group, Inc., que desenvolveu ALAFIYA, sistema de telecomunicacións baseado en satélites.^[7] O propósito deste sistema era mellorar o coidado médico en países en desenvolvemento.^[8]

Foi profesora no programa dos estudos ambientais na Universidade de Dartmouth, onde dirixiu o Instituto Jemison para o avance tecnolóxico en países en vías de desenvolvemento. Dentro dos seus proxectos actuais hai varios centrados na mellora da saúde en África e no avance das tecnoloxías en países en desenvolvemento.^[3]^[9]

Jemison foi profesora na Cornell University e no Dartmouth College desde 1995 até 2002. Ademais participa en varias organizacións científicas como American Medical Association, American Chemical Society, Association for Space Explorers e a American Association for the Advancement of Science.^[10]