José Rodríguez de Vicente

Na Galipedia, a Wikipedia en galego.
José Rodríguez de Vicente, retrato en Vida Gallega, 1932.

José Rodríguez de Vicente, coñecido como Joselín, nado en Vigo o 14 de abril de 1895 e finado en Buenos Aires o 20 de setembro de 1958[1], foi un xornalista, político e actor galego.

Traxectoria[editar | editar a fonte]

Fillo de Román Rodríguez, administrador do Pazo do Conde de Gondomar, en Baiona. Estudou en Vigo e Madrid. En 1916 marchou a Uruguai, onde traballou de xornalista no semanario Tierra Gallega, ao mesmo tempo creou o personaxe de Joselín, un galego de aldea, bo e de poucas letras, pero con moita sabedoría.

Regresou a Galicia e fundou as Irmandades da Fala de Baiona. Foi presidente do Casino Recreativo de Baiona en distintas ocasións, e adoitaba participar nas actividades culturais entre como as actuacións no teatro baionés ou a composición de letras para as comparsas do entroido. Foi nomeado alcalde accidental de Baiona a principios da ditadura de Primo de Rivera, e foi tenente alcalde en distintos gobernos. Volveu ser alcalde entre 1927 e 1929. Durante o seu mandato puxo en marcha distintas reformas sanitarias, reparación de fontes e da Casa Consistorial[2]. En xullo de 1927 nomeou fillo adoptivo de Baiona a Ángel Bedriñana, propietario do Palacio de Monte Real.[Cómpre referencia] En outubro recibiu as súas maxestades Afonso XIII e a súa esposa Vitoria Uxía de Battenberg. Miguel Primo de Rivera concedeulle a distinción de Cabaleiro da Orde do Mérito Civil na súa visita de agosto de 1928, insignias que lle foron impostas en agosto do ano seguinte, tras a subscrición popular que se fixo en Baiona para a súa figura. Dimitiu do seu cargo en outubro de 1929, e foi substituído polo seu tenente alcalde Vicente Vázquez González.

José Rodríguez de Vicente en La Hora Gallega, 1933.

Posteriormente traballou en Salamanca nunha oficina de turismo e en Madrid como xornalista no diario La Nación. Logo dalgunha incursión no mundo do teatro (en 1932 estreou Terra Nai no Teatro García Barbón), trasladouse a Buenos Aires, onde foi director da revista España do Hospital Español dende 1936. Organizou unha compañía de teatro e elaborou guións para filmes e documentais en colaboración con Suevia Films. Dirixiu a emisión radiofónica La Hora Gallega, de Radio Patria.

Creou en Buenos Aires o centro Ayuntamiento de Bayona, posteriormente transformado en Círculo Social Val Miñor. En 1955 foi premiado coa Cruz de Isabel A Católica.

Era irmán de Román Rodríguez de Vicente.


Predecesor:
Pedro Miranda Suárez de Puga
 Coat of Arms of Baiona (Official).svg
Alcalde de Baiona
 
1927 - 1929
Sucesor:
Vicente Vázquez González

Notas[editar | editar a fonte]

  1. El Pueblo Gallego, 30-9-1958, p. 2
  2. Faro de Vigo, 1-4-1928

Véxase tamén[editar | editar a fonte]

Ligazóns externas[editar | editar a fonte]