Illas Kermadec

Illas Kermadec

Tipo	grupo de illas
Epónimo	Jean-Michel Huon de Kermadec (pt)
Localizado na área protexida	Kermadec Islands Nature Reserve (en) e Kermadec Islands Marine Reserve (en)
Localización
División administrativa	Nova Zelandia
29°16′37″S 177°55′24″O
Bañado por	Océano Pacífico
Composto por	Nugent Island (en) Egeria Rock (en) Macauley Island (en) Raoul Island (en) L'Esperance Rock (en) Chanter Islands (en) Napier Island (en) Dayrell Island (en) Meyer Islands (en) Curtis Island (en)
Características
Altitude	516 m
Superficie	33 km²
Historia
Data de creación ou fundación	1887

As Illas Kermadec son un arco insular no océano Pacífico sur. As illas forman parte de Nova Zelandia desde 1887.

As illas atópanse entre os 29° e 31.5° de latitude sur e os 178° e 179° de lonxitude oeste, 800 - 1.000 km ao nordés da Illa Norte de Nova Zelandia, e a unha distancia similar ao suroeste de Tonga. O centro do grupo das Illas Kermadec sitúase aproximadamente nas coordenadas 29°16′37″S 177°55′24″O.

Xeografía

O grupo inclúe 4 illas principais (3 das cales poden ser consideradas grupos de illas, porque as respectivas illas principais teñen illas menores ao redor) e algunhas rocas illadas, as cales son, de norte a sur:

• Illa Raoul ou Illa Sunday é lonxe a maior das Illas Kermadec. Illa Raoul sitúase nas coordenadas 29°16′00″S 177°55′10″O, 900 km ao SSO de 'Ata, a illa máis austral de Tonga, e 1.100 km ao NNE de Nova Zelandia, cunha área de 29,38 km², con numerosas illas menores satélites, a maior altura é o Pico Moumoukai, con 516 msnm)
• Illa Macauley, a segunda en tamaño (situada en 30°14′S 178°26′O, 110 km ao SSE da Illa Raoul, a maior altura é o Monte Haszard cunha elevación de 238 msnm, área 3,06 km² cunha illa veciña: Illa Haszard)
  • Roca Macdonald, a uns 4 km ao norte da Illa Macauley aos 30°11′S 178°26′O
• Illa Curtis, a terceira en tamaño (30°32′32″S 178°33′39″O, 35 km ao SSE da Illa Macauley, 137 msnm de elevación máxima, área 0,59 km², coa veciña Illa Cheeseman)
• Roca L'Esperance, ex Roca Francesa (80 km ao SSE da Illa Curtis aos 31°26′S 178°54′O, 250 m de diámetro, área 0,05 km², elevación máxima 70 msnm)
  • Roca L'Havre, a uns 8 km ao NWW da Roca L'Esperance, aproximadamente 31°21′S 178°59′O (mergullada, apenas emerxe durante a marea baixa)

Os montes submarinos ao norte e ao sur das Illas Kermadec son unha extensión da cadea que corre entre Tonga e Nova Zelandia.

• Star of Bengal Bank, 103 km SSW da roca L'Esperance, con polo menos unha profundidade de 48 metros.

A área total das illas é de 33,08 km². As illas están deshabitadas, excepto pola base permanentemente ocupada Raoul Island Station, unha estación meteorolóxica e de radio e albergue para o Departamento de Conservación, oficiais e voluntarios que a mantiveron desde 1937 nos socalcos do norte da Illa Raoul, a uns 50 m de altura sobre os cantís de Fleetwood Bluff. Raoul Island Station representa o posto de avanzada máis setentrional de Nova Zelandia.

O clima das illas é subtropical, cunha temperatura media mensual de 22,4 °C en febreiro e unha temperatura media mensual de 16,0 °C en agosto. Con precipitacións de aproximadamente 1.500 mm anuais, con precipitacións máis escasas de outubro a xaneiro.

mapa das illas Kermadec

Xeoloxía

As illas son un arco insular volcánico, formado no límite de converxencia onde a Placa do Pacífico entra en subducción baixo a placa indoaustraliana. A placa de subducción do Pacífico creou a Fosa das Kermadec, unha fosa submarina de 8 km de profundidade, ao leste das illas. As illas están ao longo do cordón submarino das Kermadec, que corren desde as illas fronte á Illa Norte de Nova Zelandia no suroeste, ata Tonga no nordés (Arco Kermadec-Tonga). As catro illas principais son as cúspides de volcáns que se erguen o suficiente desde o leito mariño para proxectarse sobre o nivel do mar. Hai outros volcáns na cadea que non alcanzan o nivel do mar, pero forman montes mariños con entre 65 e 1.500 m de auga sobre as súas cimas. O monte submarino Monowai, cunha profundidade de 120 m sobre a súa cima, está a medio camiño entre a Illa Raoul e Tonga. 100 km ao sur da Roca L'Esperance está o pouco explorado Banco Star of Bengal, probablemente con volcáns submarinos. Máis ao sur están os Montes mariños do cordón do sur das Kermadec, o máis austral deles, o monte mariño Rumble IV, está a só 150 km ao norte da Illa Norte de Nova Zelandia. O cordón eventualmente conecta a Illa White na Baía de Plenty de Nova Zelandia, ao extremo norte da Zona Volcánica Taupo. As illas experimentan moitos terremotos produto do movemento das placas e do vulcanismo.

As illas Raoul e Curtis son ambas volcáns activos. Os volcáns doutras illas están actualmente inactivos, e as illas menores son os restos erosionados de volcáns extintos.

Bosque subtropical húmido das Illas Kermadec

scalyfin das Kermadec- parte da rica biota mariña das illas

As illas son recoñecidas polos ecólogos como unha ecorexión propia, o bosque subtropical húmido das Illas Kermadec. forman unha ecorrexión bosques húmidos tropicais e subtropicais de folla ancha, parte da ecozona de Oceanía. Os bosques son dominados pola Metrosideros kermadecensis, de flores vermellas, relacionadas coa Pōhutukawa (M. excelsa) de Nova Zelandia. As illas non teñen mamíferos nativos, pero son o fogar de moitas aves mariñas que aniñan entre os bosques.

Flora

As illas Kermadec son o fogar de 113 especies nativas de plantas vasculares, das cales 23 son endémicas, xunto con brións (52 especies nativas), liques e fungos (89 especies nativas). A maioría das especies de plantas derivan de Nova Zelandia, con outras do Pacífico tropical.

Densos bosques subtropicais cobren a maior parte de Raoul, e antigamente cubrían Macauley. Metrosideros kermadecensis é a árbore dominante, formando unha canopea de 10 – 15 m de altura. Unha endémica Palma Nikau (Rhopalostylis cheesemanii) é outra importante árbore da canopea. Os bosques contan cun rico sotobosque de árbores menores, arbustos, fentos e herbas, incluíndo Myrsine kermadecensis; Lobelia anceps, Poa polyphylla, Coprosma acutifolia, e Coriaria arborea. Dous fentos arborescentes endémicos, Cyathea milnei e o raro e en perigo Cyathea kermadecensis, atópanse tamén nos bosques.

Áreas próximas á costa e expostas á brisa salgada están cubertas por unha comunidade diferenciada de arbustos e fentos, destacando Myosporum obscurum, Coprosma petiolata, Asplenium obtusatum, Cyperus ustulatus, Disphyma australe, e Scirpus nodosus.

152 especies de plantas introducidas por humanos establecéronse nas illas.

Historia

Xente de Polinesia estableceuse nas Illas Kermadec ao redor do século XIV (e quizais anteriormente no século X), pero cando os europeos chegaron ao área en 1788 non atoparon habitantes. As illas foron bautizadas en honra ao capitán Francés Jean-Michel Huon de Kermadec, que visitou as illas como parte da expedición do d'Entrecasteaux nos 1790s. Colonos europeos e baleeiros viviron nas illas desde principios do século XIX ata 1937. Desde entón, unha estación meteorolóxica e de radio do goberno e albergue para oficiais e voluntarios do Departamento de Conservación mantivéronse na Illa Raoul.

Conservación

Gatos, ratas, e cabras introducidas devastaron os bosques e as aves mariñas. O pastoreo das cabras eliminaron os bosques da Illa Macauley, deixando praderías abertas, e alteraron o sotobosque da Illa Raoul. Depredación por ratas e gatos reduciron as colonias de aves mariñas das illas principais desde millóns de aves a decenas de miles. O goberno de Nova Zelandia estivo traballando durante as últimas décadas para restaurar as illas. Nova Zelandia declarou as illas reserva natural en 1937, e o mar que as rodea reserva mariña en 1990. As cabras foron sacadas de Macauley en 1970 e de Raoul en 1984, e os bosques empezáronse a recuperar. As illas aínda son coñecidas polas súas aves, e colonias de aves mariñas actualmente habitan os illotes contiguos, os cales están a salvo da introdución de ratas e gatos. Os esforzos están orientados actualmente a sacar as ratas e os gatos das illas, así como algunhas das plantas invasoras introducidas.

As visitas ás illas están restrinxidas polo Departamento de Conservación. O Departamento permite visitas a Raoul a voluntarios encargados da restauración ambiental ou proxectos de monitoreo, e outros visitantes comprometidos co estudo da natureza. As visitas ás outras illas están xeralmente restrinxidas a aquelas comprometidas no estudo científico das illas.

Terremoto de 2006

O 16 de maio de 2006, ás 22:39 horas, hora de Nova Zelandia, un terremoto grao 7,6 sacudiu a rexión e foi sentido tan lonxe como en Christchurch.

Véxase tamén

Ligazóns externas

• Bosques subtropicais húmidos das Illas Kermadec (World Wildlife Fund) (en inglés)
• Reserva mariña de Kermadec (Departamento de Conservación de Nova Zelandia) (en inglés)
• Reserva mariña de Kermadec (Seafriends): xeografía, historia, ecoloxía, historia natural, mergullo (80pp) (en inglés)