Piornedo, Castrelo do Val

A parroquia de Piornedo, da que forma parte tamén Monteveloso no concello de Castrelo do Val, está situada aproximadamente a 900 metros de altitude, na parte fonda das abas de Pena Nofre e Cabeza de Valdefeiras, con orientación sueste e espléndidas vistas. As súas terras dun labor agrogandeiro típico de montaña estan delimitadas polos regatos Arbaiguitos, Caneria e Porto, afluentes do río Mente.

O seu nome, que se repite nos Ancares e na provincia de Cáceres indica terra de piornos e nos mellores tempos, antes da emigración contou con 60 veciños: hoxe queda menos da metade, que seguen cultivando patacas, castañas e unha cabana aínda importante de vacas de carne, cabras e ovellas, aínda que a poboación, maioritarimente envellecida, vive das pensións.

Os primeiros emigrantes de Piornedo saíron cara ós Estados Unidos, Cuba e o Brasil, onde alguns fixeron fortuna. Veciños de Piornedo participaron como asalariados na construción da vía do tren Zamora - Ourense nos anos 30, morrendo e enfermando nas obras algúns deles. Posteriormente, nos anos 50, algúns instaláronse en Verín, País Vasco e Barcelona e nos 60 emigraron a Alemaña e Suíza principalmente. Nos últimos anos (2000-2006), fíxose unha praza no centro da aldea, rodeada de lugares onde comer (forno de leña para pan ou para asar) e reunirse coa xente do lugar, axeitando a aldea para o turismo rural .