Dracón de Atenas

Na Galipedia, a Wikipedia en galego.
Dracón de Atenas
Nacementoanos 650 a. C.
Lugar de nacementoAtenas
Falecementoanos 600 a. C.xuliano
Lugar de falecementoExina - Αίγινα
NacionalidadeAntiga Atenas
Ocupaciónlexislador
editar datos en Wikidata ]

Dracón (en latín Dracon, en grego antigo Δράκων) foi o autor do primeiro código legal escrito de Atenas chamado Δεσμοί (Desmói "lazos, cadeas"), para distinguilo dos νόμοι (nómoi "leis, costumes") de Solón. Estableceuna ao redor do ano -621, cando conseguiu o cargo de tesmóteta (θεσμοθέτης "lexislador") de Atenas.

Este código estableceu a pena de morte para case todos os crimes, desde pequenos roubos e sacrilexios ata asasinatos, o que levou a Heródico e a Démades a dicir que estas leis non eran dun home, senón dun dragón (δράκων), e que non estaban escritas con tinta, senón en sangue. Defendeuse dicindo que as faltas leves merecían a morte e que para as maiores non había un castigo maior que impoñer, segundo explicaron Aristóteles, Plutarco e Aulo Xelio[1]. Aristóteles, se o fragmento é seu, di que Dracón non cambiou a constitución de Atenas e que a única característica destacable das súas leis era a severidade das penas[2].

Nestas leis estableceu disposicións para a educación dos cidadáns e constituíu os efetas (ἐφέτης ephetes) como tribunal de apelación do ἄρχων βασιλεύς (arconte basileus) para os casos de homicidio accidental. Crese que estas leis foron establecidas no cuadrienio da 39a Olimpíada, no -622 ou -621.

A maioría das leis de Dracón quedaron obsoletas despois do -594, pero algunhas, segundo Andócides, permaneceron en vigor ata o final da Guerra do Peloponeso, como a lei que permitía que un marido matase á súa muller se a sorprendía en adulterio. Demóstenes di que Dracón e Solón foron especialmente honrados polas súas boas leis, e Suídas e Pausanias engaden que algúns pobos adoptaron unha das leis de Dracón que dicía que se un obxecto inanimado causaba a morte de alguén, ese obxecto debía ser desterrado do territorio.

Suídas tamén di que morreu en Exina, asfixiado pola gran cantidade de sombreiros e capas que lle lanzaban a cidade para honralo nun teatro.

Do seu código deriva o adxectivo draconiano, que significa extrema e cruelmente severo (p. ex. medidas draconianas medidas extrema e cruelmente severas)[1].

Notas[editar | editar a fonte]

  1. 1,0 1,1 Dracon a: William Smith (editor), A Dictionary of Greek and Roman Biography and Mythology. Vol. I. Boston: Little, Brown & Comp., 1867, p. 1072
  2. Aristóteles. Política, II, 2

Ver tamén[editar | editar a fonte]

Outros artigos[editar | editar a fonte]