Dólar da Illa do Príncipe Eduardo
| Dólar da Illa do Príncipe Eduardo † | |
|---|---|
.jpg) | |
| Ámbito: |  Illa do Príncipe Eduardo |
| Fracción: | Cent (¢) |
| Moedas: | 1 cent. |
| Billetes: | 1, 2, 5, 10 e 20 dólares. |
| Emisor: | |
O dólar da Illa do Príncipe Eduardo foi a moeda propia da Illa do Príncipe Eduardo entre 1871 e 1873, cando este territorio se integrou na Confederación do Canadá e asumiu o dólar canadense como unidade monetaria.
O dólar da Illa do Príncipe Eduardo dividíase en 100 centavos (cents).
Antecedentes
[editar | editar a fonte]As primeiras moedas utilizadas na Illa do Príncipe Eduardo, do mesmo xeito que no resto do Canadá, foron as levadas consigo polos primeiros colonos e polos comerciantes que se achegaban ás súas costas.[1]
Ao longo do século XIX utilizáronse tamén reais de oito españois aos que se lles recortaba a súa parte central. Deste xeito, o aro exterior resultante circulaba co valor de 5 xilins ou un cuarto de libra esterlina, e o núcleo co valor dun xilin.[2][3]
Neste contexto, á medida que os intercambios comerciais ían xerando unha maior necesidade de moeda circulante, algúns comerciantes e entidades locais comezaron a cuñar as súas propias moedas, baixo o sistema monetario inglés, coñecidas na tradición anglosaxoa como tokens.[1][4]
 |
 |
Foi moi frecuente a posta en circulación de moedas de cobre con valor de medio penique a partir de 1830, e que estiveron en uso ata despois de 1860. As máis habituais amosaban lendas alusivas á actividade pesqueira e ao comercio, como SHIPS COLONIES & COMMERCE,[6] ou SUCCESS TO THE FISHERIES,[7] ou tamén SELF GOVERNMENT AND FREE TRADE[5].[1][4]
O dólar da Illa do Príncipe Eduardo
[editar | editar a fonte]A Illa do Príncipe Eduardo adoptou o sistema decimal no seu sistema monetario en 1871, e deste xeito o dólar, dividido en cen centavos (cents) pasou a substituír a libra como unidade monetaria deste territorio colonial. A lei que determinou esta reforma tamén fixou o tipo de cambio entre a libra esterlina e o dólar da Illa do Príncipe Eduardo, de maneira que unha libra equivalía a 4,8666 dólares, a mesma paridade cá do dólar canadense. Mediante esta mesma lei autorizábase tamén o Goberno colonial para dispor a impresión de papel moeda con valor facial expresado en dólares e para emitir moedas divisionarias de cobre co seu valor en centavos.[8][9]
Moedas
[editar | editar a fonte]A única moeda oficial cuñada dentro do efémero sistema monetario do dólar da Illa do Príncipe Eduardo foi a dun centavo, cunha única emisión, datada en 1871.[10]
O deseño de ambas as faces desta moeda débeselle a Leonard Charles Wyon, daquela gravador xefe da Royal Mint, de Londres. O seu anverso amosa un busto da raíña Vitoria rodeado pola lenda VICTORIA QUEEN e coa data no exergo. O reverso foi especialmente deseñado para esta emisión e estaba caracterizado polo símbolo da colonia: un gran carballo, que simboliza a Inglaterra, dando abeiro a outros tres máis novos, símbolo dos tres condados que compuñan a Illa do Príncipe Eduardo. Baixo este motivo principal áchase a inscrición PARVA SUB INGENTI ("O pequeno debaixo do grande"), e rodeando o conxunto, a lenda PRINCE EDWARD ISLAND e o valor facial: ONE CENT.[10][11][12]
 |
 |
Deste medio penique cuñouse un millón de exemplares na Ceca de Heaton, en Birmingham, coa supervisión da Royal Mint, de Londres, aínda que as moedas carecen de marca de ceca.[11][12]
O seu peso é de 5,80 gramos, o seu diámetro é de 25,40 milímetros, e está cuñada nunha aliaxe de 90-70 % de cobre e 10-30 % de estaño.[10][11]
Billetes
[editar | editar a fonte]O Tesouro da Illa do Príncipe Eduardo xa emitira con anterioridade, entre 1848 e 1858, papel moeda co seu valor facial expresado en libras esterlinas, unha serie composta polos billetes de 5 e de 10 xilins, e de 1, 2 e 5 libras.[13]
Posteriormente, o Merchant Bank of Prince Edward Island emitiu entre 1871 e 1891 billetes de 1, 2, 5, 10 e 20 dólares,[14] e preparou tamén probas dun billete de 5 dólares en 1900, aínda que este non chegou a ver a luz.[15]
En 1872, novamente o Tesouro emitiu billetes de 10 e de 20 dólares, e o mesmo ano, dous bancos autorizados, o Bank of Prince Edward Island e o Union Bank of Prince Edward Island, comezaron tamén a emitir os seus propios billetes de 1, 2, 5, 10 e 20 dólares. Tamén emitiron papel moeda nesta época o Merchants Bank of Prince Edward Island e o Summerside Bank of Prince Edward Island.[16][17]
A partir do ano seguinte, os bancos privados da Illa do Príncipe Eduardo comezaron a emitir os seus billetes en dólares canadenses, para o que inicialmente se aproveitaron os xa emitidos ata entón e postos en circulación, aos que se lles engadía un selo coa expresión "CANADIAN CURRENCY".
Emisións do Bank of Prince Edward Island
[editar | editar a fonte]O Bank of Prince Edward Island constituíuse o 14 de abril de 1856 en Charlottetown,[18] logo de case dous anos de negociacións coa metrópole para que esta aceptase a legalidade do establecemento dun banco na colonia.[19] O 13 de agosto dese mesmo ano, o banco abriu as súas portas,;[20] fundado por James Peake, Richard Heartz, Daniel Davies, Henry Haszard e Daniel Brenan.[21] Foi a primeira entidade bancaria en entrar en funcionamento na illa.[22]
En 1857, este banco pechou temporalmente durante tres meses, logo de se descubrir que se realizaran préstamos que superaban o seu propio capital,[20] o que motivou a renuncia do seu presidente, Ralph Brecken.[23] Finalmente, en 1881, unha nova concesión desmesurada de préstamos levou o banco ao seu pechamento definitivo e á súa liquidación durante os oito anos seguintes (1882-1887).[24] Foi o primeiro banco canadense en se declarar en creba.[25]
A primeira emisión de papel moeda do Bank of Prince Edward Island foi datada o mesmo día da súa apertura (13 de agosto de 1856) e correspondíase con valores aínda pertencentes ao sistema anterior: 5 e 10 xilins, e 1 e 5 libras.[26] En 1859 emitiuse unha nova serie cos valores de 10 xilins e 2 libras.
En dólares da Illa do Príncipe Eduardo, o Bank of Prince Edward Island levou a cabo dúas emisións, compostas ambas polos mesmos valores e cos mesmos deseños; unha primeira datada o 1 de xaneiro de 1872 e unha segunda con data do 1 de xaneiro de 1877:[27]
| Valor facial | Datas | Imaxes de anverso e reverso | Medidas | Impresor |
|---|---|---|---|---|
| 1 dólar[28] | 1872 e 1877 | |
180 x 78 mm | British American Bank Note Co. Ltd., Montreal. |
| 2 dólares[29] | .jpg) |
187 x 82 mm | ||
| 5 dólares[30] | .jpg) |
186 x 78 mm | ||
| 10 dólares[31] | .jpg) |
183 x 78 mm | ||
| 20 dólares[32] | .jpg) |
185 x 79 mm |
Notas
[editar | editar a fonte]- 1 2 3 Willey, R. C. (2013). "Coins and Tokens". The Canadian Encyclopedia.
- ↑ "5 Shillings - Charles IIII Holey Dollar". Numista.com
- ↑ "The Royal Canadian Mint Currency Timeline Arquivado 17 de outubro de 2013 en Wayback Machine.". Royal Canadian Mint. Páxina 2.
- 1 2 "19th Century Canada Genuine Trade Tokens". London Numismatic Club.
- 1 2 "½ Penny Prince Edward island - Self government and free trade". Numista.com
- ↑ "½ Penny. Ships Colonies & Commerce". Numista.com
- ↑ "½ Penny Speed the Plough". Numista.com
- ↑ Pawell, J. (2005). Páxinas 22-44.
- ↑ An Act to establish a Decimal system of Currency on this Island, Statutes of Prince Edward Island, 34 Vict. (1871), c. 5.
- 1 2 3 4 "Canada. Prince Edward Island: 1 Cent - Victoria". Numista.com
- 1 2 3 4 "Prince Edward. 1 cent. 1871". Colnect.com
- 1 2 "1 Cent, Prince Edward Island, Canada, 1871". Museums Victoria Collections.
- ↑ Cuhaj, G. S. (ed.) (2009). Páxina 181.
- ↑ Cuhaj, G. S. (ed.) (2009). Páxinas 227-228.
- ↑ Cuhaj, G. S. (ed.) (2009). Páxina 228.
- ↑ "Billets de banque des banques du Canada (billets de banque à charte)". Numicanada.com
- ↑ "Canada. Chartered Banks". Banknote.ws
- ↑ "Customs House". Canada's Historic Places.
- ↑ Baldwin, D. O. (1985). "The Growth and Decline of the Charlottetown Banks, 1854-1906". En Acadiensis. Vol 15. Nº2. Páxina 32..
- 1 2 Baldwin, D. O.; Gill, H. (1983). "The Island's First Bank". En Island Magazine (Charlottetown). Nº 14. Páxina 9.
- ↑ Baldwin, D. O. (1985). Op. cit. Páxina 33.
- ↑ Baldwin, D. O.; Gill, H. (1983). Op. cit. Páxina 8.
- ↑ Baldwin, D. O. (1985). Op. cit. Páxina 34.
- ↑ Forbes, E. R.; Muise, D. A. (1993). The Atlantic Provinces in Confederation. University of Toronto Press. ISBN 0-8020-6817-0. Páxina 97.
- ↑ Ben-Ishai, S. (2009). "Bank Bankruptcy in Canada: A Comparative Perspective". En Banking and Finance Law Review, 25 (59).
- ↑ Cuhaj, G. S. (ed.) (2009). Páxinas 277-278.
- ↑ Cuhaj, G. S. (ed.) (2009). Páxina 278.
- ↑ "Bank of Prince Edward Island, 1 dollar". Bank of Canada Museum.
- ↑ "Bank of Prince Edward Island, 2 dollars". Bank of Canada Museum.
- ↑ "Bank of Prince Edward Island, 5 dollars". Bank of Canada Museum.
- ↑ "Bank of Prince Edward Island, 10 dollars". Bank of Canada Museum.
- ↑ "Bank of Prince Edward Island, 20 dollars". Bank of Canada Museum.
Véxase tamén
[editar | editar a fonte]Bibliografía
[editar | editar a fonte]- Berman, A. G. (2008). Warman's Coins And Paper Money: Identification and Price Guide (4 ed.). Krause Publications. ISBN 978-0-89689-683-3
- Cross, W. K. (2005). Charlton Standard Catalogue. Canadian Coins (59ª ed.). Charton Press. ISBN 978-0889682887
- Cuhaj, G. S. (ed.) (2009). Standard Catalog of World Paper Money Specialized Issues (11 ed.). Krause Publications. ISBN 978-1-4402-0450-0
- Haxby, J. A.; Willey, R. C. (1998). Coins of Canada (16ª ed.). The Unitrade Press. ISBN 978-1895909616
- Krause, C. L.; Mishler, C. (1991). Standard Catalog of World Coins: 1801-1991 (18th ed.). Krause Publications. ISBN 0873411501
- Pawell, J. (2005). A History of Canadian Dollar. Bank of Canada. ISBN 0-660-19571-2
- Pick, A. (1994). Standard Catalog of World Paper Money: General Issues (7th ed.). Krause Publications. ISBN 0-87341-207-9
