Os condrósteos (Chondrostei) constitúen unha subclase da clase dos actinopterixios (Actinopterygii) ou "peixes con aletas radiadas". Proceden de primitivos peces cartilaxinosos que mostran osificación, de onde reciben o nome, formado polos termos gregos χόνδρος chóndros, 'cartilaxe', e οστέον, ostéon, 'óso', é dicir: "de cartilaxes e ósos" (referido ao seu esquleto). Desígnanse tamén ganoides pola estrutura das súas escamas.
Porén, hoxe pénsase que os antecesores dos condrósteos eran peixes óseos (Osteichthyes), pero nos que a característica da osificación no seu desenvolvemento se perdeu ao longo da evolución, dando como resultado un alixeiramento do esqueleto. As especies de condrósteos máis primitivas mostran inicios de osificación do seu esqueleto, o que suxire que este proceso foi desaparecendo nestes peixes.
Antigamente este grupo estaba clasificado dentro dos elasmobranquios, polas similitudes obvias cos tiburóns. Estas similitudes non se reducen só á perda do tecido óseo na maioría dos condrósteos, senón que tamén a estrutura da mandíbula semella máis a dos tiburóns que á doutros peixes óseos, e tamén, coma aqueles, carecen de escamas (excluíndo os esturións). Outras características comúns dos condrósteos e máis os tiburóns son os espiráculos (presentes no esturión) e a cola heterocerca (por extensión das vértebras polo interior do lóbo maior da aleta caudal).
Pero, en calquera caso, o rexistro fósil suxire que estes peixes están máis emparentados cos teleósteos do que se pode interpretar pola aparencia.
