Castelo de Gormaz
| Castelo de Gormaz | |
|---|---|
| ben de interese cultural | |
 | |
| Concello | Gormaz |
| Provincia | Soria |
| Comunidade autónoma | Castela e León |
| Coordenadas | 41°29′37″N 3°00′29″O / 41.4937, -3.008 |
| Estilo arquitectónico | |
| Estilo orixinal | románico (século IX) |
| Estilo actual | 1931 |
| Estado actual | semi-restaurado |
| Véxase tamén | |
| Castelos de España | |
| [ editar datos en Wikidata ] | |
O castelo de Gormaz é unha fortaleza de orixe musulmá situada ao carón do concello de Gormaz na provincia de Soria. Foi declarado Monumento Nacional en 1931, e foi restaurado recentemente[cando?]. A entrada é gratuíta.
Historia
[editar | editar a fonte]
A súa construción comezou no século IX, durante o Califato de Córdoba sobre os restos dun castelo anterior de orixe cristiá ou musulmá. A construción comezou no lado noroeste do outeiro, onde se levantou un pequeno castelo. A fortaleza foi conquistada polos cristiáns no 912 e volveu a mans musulmás durante o califato de Al-Hakam II quen ordenou a súa ampliación ao xeneral Galib, tarefa que se emprendeu entre o 955 e o 966.
O castelo de Gormaz converteuse así en peza clave da defensa musulmá contra os reinos cristiáns do norte e contribuíu a mantelos afastados de Medinaceli. O castelo de Gormaz chegou a ser a máis grande fortaleza europea da súa época: cun perímetro amurallado de 1.200 m, 446 m de longo, 28 torres e unha forma moi alongada en dirección leste-oeste. A súa situación e as súas excelentes condicións de visibilidade permitían controlar unha das rutas de acceso cara ao norte e o río Douro e foi unha das posicións estratéxicas máis cobizadas por musulmáns e cristiáns durante os séculos IX e X.
No 975 o conde García Fernández, aliado con Sancho de Pamplona e Ramiro III de León, asedia o castelo pero, mentres o fai, é atacado por un exército de rescate ao mando de Galib e sofre unha humillante derrota. Volve intentalo no 978 con éxito e manteno ata o 983, cando o toma Almanzor. Permaneceu en poder dos musulmáns ata a súa conquista definitiva polos cristiáns no 1060 por parte de Fernando I de León. Rodrigo Díaz de Vivar, o Cid, foi señor de Gormaz dende 1087. Foi nesa época cando se fundou a vila de Gormaz, aos pés do castelo. Con posterioridade a súa importancia estratéxica foi diminuíndo. Foi usado posteriormente como prisión ata o seu abandono definitivo.
Arquitectura
[editar | editar a fonte]O castelo consta de dúas partes diferenciadas separadas por un foso. Ao leste encóntrase o alcázar, a torre da homenaxe, a "torre de Almanzor", o alxibe e os apousentos califais. Na parte oeste atópase un estanque para dar de beber aos animais e unha grande explanada onde acampaban as tropas. Conta cunha gran porta que denota a súa orixe islámica, a Porta Califal. Na cara oeste da muralla hai tres estelas, unha de orixe romana e outra claramente islámica, que se colocaron alí para espantar os malos espíritos.
