Ana Botella

Na Galipedia, a Wikipedia en galego.
Ana Botella
Ana María Botella Serrano
Datos persoais
Nacemento23 de xullo de 1953
 España Madrid
OrganizaciónPartido Popular
CónxuxeJosé María Aznar
FillosAna Aznar
Alma máterUniversidade Complutense de Madrid
ProfesiónLicenciada en Dereito, funcionaria do Estado e escritora
Na rede
Twitter: AnaBotellaPSOE Dialnet: 920974 Musicbrainz: e764df02-97e5-4ba2-a3fc-dbcb418e3a1e Editar o valor em Wikidata
editar datos en Wikidata ]

Ana María Botella Serrano, nada en Madrid o 23 de xullo de 1954, coñecida como Ana Botella, é unha política española do Partido Popular, alcaldesa de Madrid entre 2011 e 2015.[1]

Está casada desde 1977 con José María Aznar, presidente do Goberno de España durante as lexislaturas VI e VII, a quen coñeceu durante a súa viaxe de fin de carreira e con quen ten tres fillos: José María, Ana e Alonso Aznar Botella.

É a maior de trece irmáns, filla de Ernesto Botella Pradillo (1918-2011) e Ana María Serrano Sancho-Álvarez.[2]

Traxectoria[editar | editar a fonte]

Formación[editar | editar a fonte]

Cursou os seus estudos de primaria e secundaria nun colexio relixioso das Nais Irlandesas. Estudou Dereito na Universidade Complutense de Madrid.[3]

Funcionaria da Administración[editar | editar a fonte]

Aprobou as oposicións para o Corpo de Técnicos de Información e Turismo e desde entón traballou para a Administración Pública (no Ministerio do Interior, o Goberno Civil de Logroño, o Ministerio de Obras Públicas, a Delegación de Facenda de Valladolid e o Ministerio de Facenda).[4]

Carreira política[editar | editar a fonte]

En 2003 foi elixida concelleira do Concello de Madrid, e nomeada segunda tenente de alcalde, ocupándose da Concellaría de Goberno de Emprego e Servizos á Cidadanía ata 2007.

Desde 2004 forma parte do Comité de Dirección do Partido Popular de Madrid. Foi secretaria executiva de Acción Social ata 2008, e desde entón secretaria executiva de Acción Sectorial. É membro do Comité Executivo Nacional do Partido Popular desde 2008.

Nas eleccións de 2007 foi a número dous na lista do Partido Popular novamente para o Concello de Madrid e ocupou a Concellaría de Medio Ambiente.

En xuño de 2011 foi ratificada como segunda tenente de alcalde e titular da área de Goberno de Medio Ambiente e Mobilidade.[5]

O alcalde Alberto Ruiz-Gallardón deixou a alcaldía de Madrid o 22 de decembro de 2011 posto que fora designado un día antes como ministro de Xustiza polo presidente do Goberno, Mariano Rajoy. Asumiu o cargo de alcalde como interino durante cinco días o vicealcalde Manuel Cobo e o 27 de decembro do mesmo ano o pleno do Concello escolleu (con 31 votos de 55) a Ana Botella como primeira alcaldesa de Madrid.[6]

Na presentación final da Candidatura de Madrid 2020 en Buenos Aires, en setembro de 2013, participou na delegación española, e utilizou nas súas comunicacións con xornalistas un limitado coñecemento de inglés.[7]

O 9 de setembro de 2014 anunciou a súa intención de non concorrer ás urnas nas eleccións municipais de 2015[8], tralas cales abandonou a alcaldía.

Notas[editar | editar a fonte]

Véxase tamén[editar | editar a fonte]


Predecesor:
Alberto Ruiz-Gallardón
 
Alcaldesa de Madrid
 
2011 - 2015
Sucesor:
Manuela Carmena