Tux

Na Galipedia, a Wikipedia en galego.
Tux, a mascota de Linux.

Tux é o nome da mascota oficial de Linux. É un pequeno pingüín de aspecto cómico, creado por Larry Ewing no 1996. A idea de que a mascota do kernel Linux fora un pingüín provén do mesmo Linus Torvalds, creador do kernel Linux. Segundo se conta, cando era neno picouno un pingüín; ademais dende pequeno amosou unha gran simpatía por estes animais. Non ten un significado en específico.

Orixe[editar | editar a fonte]

A versión de Tux do sistema Slackware.

Existen dúas versións sobre a orixe do seu nome. A primeira suxire que o nome provén do feito de que os pingüíns semellan vestir un esmoquin (que en inglés é tuxedo, abreviado tux). A segunda é que as letras que compoñen Tux provén das palabras Torvalds Unix.

Tux foi deseñado durante un concurso para elixir un logotipo para Linux. As ferramentas utilizadas para a súa creación foron, por suposto, un computador co sistema operativo con kernel Linux e o software libre de manipulación de imaxes GIMP. Algunhas das imaxes enviadas atópanse aínda dispoñibles na web do concurso.1

Toda-las distribucións de Linux teñen unha versión de Tux, tales como Ubuntu, Debian, Fedora e Slackware entre outros.

Uso[editar | editar a fonte]

O logotipo pódese usar e modificar sen restricións, sempre que se recoñeza a autoría de Larry Ewing, tal e como se indica na súa páxina.

Tux volveuse unha icona para as comunidades de Linux e de software libre; un grupo de linuxeros británico incluso adoptou un pingüín no zoolóxico de Brístol. É moito máis famoso que o seu gran amigo, GNU, un ñu pacífico e algo tímido que representa o proxecto GNU e ó seu sistema operativo.

Versións[editar | editar a fonte]

Segundo o contexto pode cambiar de aparencia; por exemplo, representando ó algoritmo de seguridade PaX, ten un casco, un machado, un escudo e os ollos vermellos. Tux é o protagonista de varios xogos para Linux. Tamén aparece como personaxe na tira cómica User Friendly.

Nalgunhas distribucións de Linux, Tux saúda ó usuario durante o inicio; os sistemas con múltiples procesadores amosan tantos Tuxes como núcleos dispoña o sistema. Algúns consideran a Beastie, a mascota de BSD, como o peor inimigo de Tux.

Amor (amusing misuse of system resources, algo así coma "divertido desperdicio de recursos do sistema") é un alegre Tux que camiña polas xanelas do escritorio e algunhas veces taládra-as ou marcha voando cunha hélice, ademais de dar consellos e axuda sobre o sistema operativo e os programas.

Notas[editar | editar a fonte]

1. Linux Logo Competition