O burgomestre de Delft e a súa filla

Na Galipedia, a Wikipedia en galego.

O burgomestre de Delft e a súa filla
("Adolf en Catharina Croeser aan de Oude Delft")
ArtistaJan Steen
Data1655
TécnicaÓleo sobre lenzo
MovementoBarroco
Dimensións82,5 cm × 68,5 cm
LocalizaciónRijksmuseum (Ámsterdam)

O burgomestre de Delft e a súa filla (ou coa variante "alcalde" en lugar de "burgomestre")[1], coñecido tamén, sobre todo na tradición holandesa, como Adolf e Catharina Croeser na Vella Delft (en neerlandés: Adolf en Catharina Croeser aan de Oude Delft), é o nome co que se coñece unha pintura ao óleo sobre lenzo de 1655, do pintor holandés Jan Steen.[2]

Descrición e interpretación[editar | editar a fonte]

Autorretrato de Jan Steen (1670). Galería de Honra do Rijksmuseum

O cadro está asinado no bordo dun chanzo das escaleiras e datado en 1655, e pintouse sobre un lenzo de 32,5 por 27 polgadas. Trátase dun bo exemplo da idade de ouro da pintura holandesa e forma parte da colección do Rijksmuseum.

Esta pintura foi documentada por Hofstede de Groot en 1910, quen escribiu:

"878. Chamado retrato do burgomestre de Delft e a súa filla. O home está sentado no centro, nas escaleiras diante da súa casa; terma dunha folla de papel. A súa filla baixa dous pasos á esquerda cara ao espectador. O home viste de negro; a moza ten unha saia azul e un vestido gris púrpura.

Unha mendicante de vermello cun cativo diríxese cara ao home pola dereita. Na distancia, á dereita, vese a torre da Igrexa Vella de Delft, e á esquerda da cabeza do home hai unha torre pequena. Unha ponte de pedra coas armas da cidade leva á cidade vella de Delft.

Á esquerda, na fiestra da casa, hai un ramo de flores nun vaso. A casa proxéctase lixeiramente diante das outras casas da rúa. A follaxe das árbores cobre parte da imaxe".[3]

A partir da venda do cadro en 1808, empezou a ser coñecido como "O burgomestre de Delft e a súa filla". Se a tradición é correcta, as persoas representadas nel son Geraldo Briel van Welhoeck (1593-1665) e a súa filla, nada en 1638 e casada en 1656 con Adriaan Bogaert van Beloys.[4]

Rastrexabilidade da obra[editar | editar a fonte]

  • Venda de Michael Engelberts e Ian Tersteeg. Ámsterdam. 13 de xuño de 1808. Número 142. Comprado polo comerciante de arte Nieuwenhuys por 75 floríns.
  • Domsert, Londres. 1811. Comprado a Nieuwenhuys por Lord Penrhyn, quen o incorporou á súa colección do Castelo de Penrhyn", onde permaneceu máis dun século.
  • A pintura foi vendida ao Rijksmuseum en xullo de 2004 por 11,9 millóns de euros, o que supuxo o cadro máis caro comprado polo museo.[5] O Goberno británico atrasou a emisión da necesaria licenza de exportación para lles dar ás institucións británicas a posibilidade de comprar o cadro, mais tras a retirada da oferta da única institución inicialmente interesada, a licenza de exportación foi emitida finalmente.[6]

Notas[editar | editar a fonte]

  1. ↑ O DRAG define "burgomestre" como: Primeiro maxistrado municipal dalgunhas cidades en países como Alemaña, Suíza, Holanda ou Bélxica.
  2. ↑ Ficha do cadro na base de datos do Instituto de Historia da Arte dos Países Baixos (Nederlands Instituut voor Kunstgeshiedenis). (En neerlandés)
  3. ↑ Hostede De Groot, Cornelis. A Catalogue Raisoné of the Works of the Most Eminente Dutch Painters of the Seventeenth Century. Macmillan and Co. Londres. 1908. Páxina 241. (En inglés)
  4. ↑ "True identity discovered of persons on masterpiece Jan Steen Arquivado 25 de outubro de 2017 en Wayback Machine.". Universidade de Amsterdam. 21 de decembro de 2006. (En inglés)
  5. ↑ "Rijksmuseum verwerft schilderij van Jan Steen" En Nrc.nl. 16 de agosto de 2004. (En neerlandés)
  6. ↑ "Reabre o Rijksmuseum, a catedral da arte holandés" (sic). En Faro de Vigo. Arte. 14 de abril de 2013. (En galego) "A leiteira" e "Muller lendo unha carta", de Johannes Vermeer; "O alegre bebedor" de Frans Hals; "O alcalde de Delft coa súa filla" de Jan Steen e outras pinturas de Rembrandt como "A noiva xudía" ou "Autorretrato de moza" son outros dos tesouros do Século de Ouro holandés que alberga o "Museo do Reino".

Véxase tamén[editar | editar a fonte]

Outros artigos[editar | editar a fonte]

Bibliografía[editar | editar a fonte]

  • Grijzenhout, Frans. The burgher of Delft : a painting by Jan Steen. Amsterdam Rijksmuseum. Amsterdam. 2006. [ISBN 9789086890217] (en inglés)
  • Vinken, Pierre Jacques. "Een embleem van Coornhert als bron van Jan Steens zogenaamde 'Burgemeester van Delft'"[1]. En Oud Holland. Vol. 112, No. 4 (1998), pp. 253–258. (En neerlandés)
  • Wouter Kloek. Jan Steen (1626-1679). Waanders Publishers. Amsterdam. 2005. [ISBN 9789040089916] (en neerlandés)
Traído desde «https://gl.wikipedia.org/w/index.php?title=O_burgomestre_de_Delft_e_a_súa_filla&oldid=6610030»