800beloved
| 800beloved | |
|---|---|
| Orixe | Milford, Detroit, Míchigan, Estados Unidos  |
| Período | 2005 - presente |
| Xénero(s) | post-punk revival, shoegaze, indie rock, dream pop |
| Selo(s) discográfico(s) | Moodgadget (2008-2010) |
| Membros | Sean Lynch Anastasiya Metesheva Ben Collins |
| Antigos membros | Scott Masson Jonathan Elkas Eric Wilson Selena Sunday Courtney Marie Nicole Kosiba Allen Goodman |
| Na rede | |
| Web | |
800beloved é unha banda estadounidense de post-punk formada na pequena poboación de Milford, moi preto de Detroit (Míchigan) no ano 2005. Está formada principalmente por Sean Lynch, multi-instrumentista e cantante, quen en cada traballo acada a colaboración doutros músicos que eventualmente intégrana. Actualmente figuran nela ademais de Lynch (guitarra eléctrica e voz), Anastasiya Metesheva (baixo) e Ben Collins (batería).
Historia[editar | editar a fonte]
800beloved está liderado polo seu letrista e cantante Sean Lynch, que traballa como cosmetólogo e asistente na funeraria do seu pai, Thomas Lynch, á súa vez recoñecido poeta e ensaísta[1]. Moi novo, Lynch publicou en 2001 un traballo titulado 88 Tracks to Take, que serviría de ensaio para a futura formación 800beloved. Ademais, produciu no 2008 o EP The Equine Lips do dúo de Detroit Silverghost no estudio da súa propia casa[2].
O nome do grupo procede do prefixo de números de chamadas gratuítas no seu país, os 1-800. Refírese á fusión do interese na fraxilidade da cultura popular (representado pola partícula 800) co emprego lírico que ás veces, inxenuamente e de xeito sombrío, se fai de temas máis sagrados (ao que alude o termo beloved, ou "amado").
O seu primeiro traballo, autoproducido, foi o sinxelo Tidal, que se presentou o 8 de decembro de 2007 con catro versións do mesmo tema[3]. Neste traballo contou coa colaboración de Anastasiya Metesheva (baixo), Scott Masson e Jon Elkas (guitarra eléctrica]). A propia Metesheva encargouse do deseño da portada.
En 2008 asinou un contrato co selo Moodgadget, e ao seguinte ano presentou no día dos namorados o seu álbum de debut, Bouquet[4], no que levaba traballando desde o 2005. Contou con once temas nos que colaboraron en diferentes cancións os músicos Anastasiya Metesheva (baixo), Selena Sunday (coros) e Jon Elkas (guitarra eléctrica), tendo a axuda do anxelino Adam E. Hunt na produción e de Tim Pak na masterización.
Dous anos despois, publicou o 23 de febreiro de 2010 de xeito gratuíto na rede o sinxelo instrumental If Butterflies Never Burned - Stomach Mix[5]. Este tema incluíuse no seu segundo álbum que baixo o título Everything Purple[6] presentouse o 18 de setembro, cun total de nove temas. Neste traballo colaboraron na música e nos arranxos de novo tanto Metesheva como Masson, quen tamén foi o co-produtor con Lynch. Tamén neste caso Hunt colaborou na mestura e masterización. Pouco despois, Lynch rompeu con Moodgadget[7].
O 9 de abril de 2014 presentouse o sinxelo Some Kind of Distortion[8], tema principal do seu terceiro longa duración, que foi presentado o 3 de agosto de 2015 co homónimo título Some Kind of Distortion[9], e cun total de oito temas. Foi co-producido por Scott Masson e o propio Lynch.
Discografía[editar | editar a fonte]
- Tidal - 2007 (sinxelo de 4 temas)
- Bouquet - 2009 (álbum de 11 temas)
- If Butterflies Never Burned - Stomach Mix (Instrumental) - 2010 (sinxelo dun tema)
- Everything Purple - 2010 (álbum de 9 temas)
- Some Kind of Distortion - 2014 (sinxelo dun tema)
- Some Kind of Distortion - 2015 (álbum de 8 temas)
Notas[editar | editar a fonte]
- ↑ 800beloved Arquivado 17 de novembro de 2015 en Wayback Machine., artigo do 2009 de Dr. Detroit, en Motorcityrocks.com (en inglés).
- ↑ Silverghost Arquivado 17 de novembro de 2015 en Wayback Machine., en Detroitunderground.com (en inglés).
- ↑ Tidal en Bandcamp (en inglés).
- ↑ Bouquet en Bandcamp (en inglés).
- ↑ If Butterflies Never Burned - Stomach Mix (sinxelo) en Bandcamp Arquivado 17 de novembro de 2015 en Wayback Machine. (en inglés).
- ↑ Everything Purple en Bandcamp Arquivado 17 de novembro de 2015 en Wayback Machine. (en inglés).
- ↑ PLAYING DETROIT: 800beloved, artigo de Jerilyn Jordan en Audiofemme, do 2-9-2015 (en inglés).
- ↑ Some Kind of Distortion (single) en Bandcamp Arquivado 17 de novembro de 2015 en Wayback Machine. (en inglés).
- ↑ Some Kind of Distortion en Bandcamp (en inglés).
Véxase tamén[editar | editar a fonte]
Ligazóns externas[editar | editar a fonte]
- Biografía en Soundcloud de 800beloved
- PLAYING DETROIT: 800beloved, artigo de Jerilyn Jordan en Audiofemme, do 2-9-2015 (en inglés)